文/稀思路
《維護國家安全條例》成功制定，唔少人認為香港已經天下太平，從此無事，但暫時無事，唔等於以後無事，筆者嘅分析係，喺香港範圍內，由於特區政府以至警方已經作出極大努力去維繫國家同特區安全，再出現非法「佔中」、黑暴嘅可能性已經減到最低；不過，喺香港以外，其實唔少攬炒派政客，都依然喺度搞事，或者至少搵機會抹黑特區政府，所以維護國家安全嘅工作需要持續，亦要繼續反駁呢啲攬炒派政客嘅謬論，咁今日反駁邊個好？筆者揀咗許智峯，一個專顛倒是非嘅政客。
可能讀者們都已經較少留意許智峯，但點解筆者仲會留意佢？因為在眾多嘅攬炒派政客中，佢係特別乞人憎，有錯唔認，諉過於人，基本上就係佢嘅特色；星期一（20日），許智峯就喺Facebook發帖，話自己已經收到紐西蘭（奧克蘭）高等法院正式通知， 紐西蘭法庭已正式認許佢為當地律師及大律師，即日生效。最難頂嘅係，佢話紐西蘭法庭要考慮及確認佢「無因任何刑事、民事、或紀律原因而導致我的執業資格有任何限制」，包括「在香港所有政治案件中的刑事紀錄及懸紅通緝令，也包括了最近港共政權對我發出的破產令。」言下之意，係想話自己無犯罪、喺香港「被屈」。
其實，類似嘅說話，許智峯講過唔止一次，喺佢潛逃離港、喺澳洲考取律師資格到今日做埋紐西蘭「律師及大律師」，佢都係強調佢所涉嘅係「政治案件」，但事實並唔係咁！睇番公開資料，佢喺2019年7月6日「光復屯門」遊行期間，涉嫌妨礙司法公正，要求他人刪除相片及損毀他人手機；2020年5月衝擊立法會主席台阻撓內務委員會會議、2020年喺「國歌法」二讀及三讀期間喺立法會主席台「丟腐爛植物」被控。當然，仲有涉及分裂、煽動顛覆國家政權嘅香港國安法。
我哋仔細睇唔同案件，涉嫌妨礙司法公正係香港法律或普通法一直有嘅罪行，關政治咩事？佢喺議會玩衝擊、掟嘢，亦好難令人聯想到控罪係政治事件；至於涉嫌違反香港國安法，其實勾結外國勢力或者鼓吹分裂國家，呢個唔係政治問題，係法律問題，就如有人喺美國觸犯當地嘅國家安全法律，會唔會話係「政治案件」，然後就可以脫身呢？
所以，許智峯喺澳洲以至紐西蘭攞到律師資格，唔係顯示佢個人「冇問題」，而只係西方國家選擇包庇佢，如果佢喺澳紐妨礙司法公正，會唔會唔影響其律師資格？不可能！咁點解佢喺香港犯法去到西方國家可以做律師，呢個先係真正嘅政治問題，香港、澳洲以及紐西蘭，都係行普通法制度，如果一個人喺其中一個地方犯法而其他地方可以視而不見，咁係因為有政府或機構因為政治立場，而無視呢個人過去嘅不當甚至違法行為；問題出喺邊一方身上，十分明顯，許智峯再講，畀佢洗到腦嘅，可能都只係有攬炒派嘅支持者。
再將時間推前幾日，筆者仲睇到一單新聞，一個叫劉珈汶嘅前香港區議員（前公民黨核心），喺「哥本哈根民主高峰會」發言，一邊抹黑特區政府，一邊聲稱「壓迫不會使海外港人放棄」，但睇劉珈汶嘅過去，至少睇到佢喺黑暴理大事件時支持暴徒嘅立場。當一個又一個逃到海外嘅政客，都異口同聲唱衰香港時，其實係話畀香港各界聽，仲未可以鬆懈，只要機會到，肯定仲係會有人挑起事端，而且係對準特區政府甚至中央嗰隻，我哋要繼續保持警惕，要做好國家安全教育，而且喺國際戰線上，無論幾艱辛都要繼續發聲，唔能夠畀人歪理當真理，破壞當民主！
收藏
取消收藏
分享
