文/稀思路
筆者撰文講過，發生喺美國嘅大學示威，愈演愈烈，原因好簡單，就係美國有唔少義憤填膺嘅大學生，反對戰爭以及「唔停手」嘅以色列；不過，美國政府似乎就唔係好理解大學生們嘅苦心，你喺校園示威，我就派警方入校園強力清場。根據前兩日嘅消息，美國幾十間大學或學院，已經有超過2000人被捕，警方清場時亦有使用閃光彈等，以至係強力清拆示威營地嘅路障同帳篷。全國政協副主席梁振英提出咗一個非常好嘅問題，「美國警察進入校園大舉拘捕和平示威學生，當年說警察不能進入校園的香港反對派，失聲了？」
係囉，香港嘅反對派或者攬炒派，向來扮演「正義使者」，點解美國警方喺唔同大學清場，佢哋唔出聲譴責下美國警察？係咪，「契仔」永遠都無資格批評「契爺」？
睇梁振英嘅Facebook發文，真係大快人心，除咗上述嘅發文，佢仲出Post問「如果美國的任何校園出現中大二號橋的暴力，美國軍警會怎樣對付？」同埋「給在美國校園的示威者。美國政治領袖對你們不瞅不睬，我建議你們邀請羅冠聰加入校園運動，此人曾經是香港的學生領袖，現居英國，和一眾美國政客如佩洛西等關係密切，有他加入，一定如虎添翼。」睇梁振英講完，筆者真係有上羅冠聰呢啲香港反對派嘅Facebook睇下，睇下佢哋敢唔敢出聲，結果，羅冠聰對上一則發文已經係4月25日，內容係羅冠聰同美國眾議院前議長佩洛西會面，美國大學生示威，「關佢乜事」？
其實，羅冠聰見到佩洛西，有冇反映、批評美國政府強硬態度對待其大學生？筆者相信佢唔會，因為佢主要「工作」，應該係「擦鞋」同巴結佩洛西，但咁樣就引出一個問題，美國警察可以入大學清場，點解當年黑暴，香港警方入中大、理大又被質疑呢？唔好忘記，相比起美國嘅大學生，當年香港嘅暴徒兇狠得多，除咗冇真槍，汽油彈、弓箭等武器「應有盡有」，如果當年香港警方唔做嘢，亂局仲有排亂；讀者們可以諗下，如果美國嘅大學生好似當年喺中大、理大嘅暴徒咁暴力，美國警察可能已經亂槍掃射喇。
除此之外，美國嘅大學生同當年香港黑暴，仲有個極大嘅分別，前者係反戰、反侵略，後者係要推倒政府、玩分裂，如果美國警方要執法，當年香港警察更要執法；而且當年黑暴，美國官員、政客（包括佩洛西）係打開口牌支持黑暴，擺明就係干預香港甚至係「黑手」，依家美國《華爾街日報》聲稱部分抗議活動背後係「左翼團體同資深社會運動人士」對學生進行數月嘅「訓練和規劃」，但講真，呢種「幕後黑手」論，真係要搵個黑手，美國政府咪係黑手囉！
讀者們思考下，美國嘅大學嘅示威，源頭係美國政府對以巴嘅立場，美國係咪助紂為虐，讀者可以判斷；將情況套落香港，當年如果唔係美國嘅官員、政客擺出一副「與黑暴同行」嘅姿態，部分黑暴分子都未必以為自己有美國「支持」，可以去到盡；世上其他衝突、戰爭，唔少都有美國嘅手影。二次大戰後，曾經有一段日子好多人以為「以美國為首」嘅世界已經建立出一套維持和平嘅全球體系，但我哋今日睇真啲，曾有人稱為「世界警察」嘅美國，根本就係惡霸，當《華爾街日報》喺度為美國嘅示威搵黑手嘅時候，認真講美國先係黑手，仲係好多衝突嘅源頭，就如愛好和平嘅中國畀美國針對，美國仲喺度扮「和平使者」一樣，筆者唔係黑心人，唔會想美國繼續亂，但美國嘅惡行，依家係連自己嘅年輕人都睇唔過眼！
收藏
取消收藏
分享
