文/稀思路
發生喺美國嘅大學示威反對以色列浪潮，愈演愈烈，有學生佔據哥倫比亞大學某行政大樓，警方應校方要求進入校園清場，大約100人被捕；另外喺加州州立理工大學，亦有大樓被示威者佔據，大批全副武裝嘅警察進入校園驅散，校方就話有25人被捕，無人受傷。非法佔領校園，筆者一定要講「這是不對」的，不過，筆者又記得當年香港發生非法「佔中」事件，美國政客同媒體好似唔係咁講喎！即係香港發生佔領事件就支持，美國出現佔領事件就要譴責同執法？實在太過雙重標準！
先講美國兩間大學發生咩事，大批紐約市警員，包括防暴警察進入哥倫比亞大學校園清場，警員爬梯進入畀示威學生佔據嘅漢密爾頓大樓，又喺大樓附近嘅紮營地點清場，有示威者雙手被索帶綁住，清場過程無人受傷，但警方有用閃光彈。紐約市長亞當斯表明，「必須在事態進一步惡化前，出手阻止。」
而喺加州州立理工大學，都有兩幢大樓被示威者佔領，又係大批全副武裝嘅警察進入校園驅散，校園要暫時關閉，仲批評嚴重嘅犯罪活動「超出抗議的範圍，令校園面臨持續的風險」。對於校園示威、佔領事件，美國國家安全委員會發言人柯比表示，總統拜登認為，學生佔據大樓係絕對錯誤做法，並非和平示威嘅行為。
筆者先要澄清，自己絕對唔係要反對美國警察清理被佔領嘅大學校園，而係想批評（甚至嘲笑）美國政界、媒體嘅雙重標準，2014年9月底，香港發生非法佔領事件，持續咗足足79日，最後警方和平清場，但外國包括美國政客對香港非法佔領事嘅反應，就相當值得批評。喺2014年10月，美國當時就有共和黨議員稱「香港市民的抗議行為很理性，他們的訴求也很有誠意，希望抗議學生和政府真誠地協商，並達致解決方案」；到非法佔領事件後，又有美國評論員稱香港示威者向中國表達了「致力捍衛香港的自由主義、言論自由、學術自由以及法治等的決心」。
如果讀者們將今次發生喺美國嘅示威事件，用返美國政客、媒體人嘅說法，依家美國大學示威，唔係好「理性」咩？佢哋嘅訴求「冇誠意」咩？或者咁講，美國大學生示威反對戰爭，唔係捍衛緊自己嘅言論自由同法治咩？睇返美國各界當年講嘅嘢，今日我哋都應該利用呢一啲表述，一巴又一巴咁摑落美國臉上，一個地方可能因為不同原因而出現佔領事件或暴亂，但當美國有政客支持香港嘅非法佔領事件時，有冇諗過自己國家都可能「他朝君體也相同」？
其實，攞香港嘅非法佔領事件同美國大學出現嘅佔領事件比較，對香港特區政府未必公道，因為當年非法「佔中」，所要求嘅係不符合基本法嘅所謂「雙普選」，在情在理，香港警方都要執法；而發生喺美國嘅佔領事件，其實美國嘅大學生係「反戰」、「反侵略」，呢種愛好和平嘅心態，唔可以話係100%錯。美國嘅大學亂局發展到今日，讀者們仲可以反思，美國政界普遍支持以色列，到底係咩一回事？國際關係錯綜複雜，就算我哋唔講政治立場或國家與國家之間嘅關係，美國政府將大學生、青年放喺對立面，將來會唔會發生更多佔領或動亂，真係好難講。既然美國本身咁「唔得閒」，筆者拜托美國政客，唔該搞掂自己先，唔好搞香港！
收藏
取消收藏
分享
