文/稀思路
唔知讀者有否發現一個現象，就係中央以至特區政府做任何事，反對派以至美西方國家，都好鍾意問「點解中國、香港要咁做？」，黑暴運動時，會質疑點解警方要「大力」執法（唔好玩啦，對住暴徒唔通叫佢哋企喺度、唔好郁、等拉咩？）；2020年6月、7月，就係咁問點解要立香港國安法；再到近期，就係問香港點解要就《維護國家安全條例》立法。
咁多點解，其實筆者想問佢哋「點解咁多點解」先真，從黑暴運動到境外勢力擺明干預，都印證咗國家安全法對香港嘅重要，如要問點解香港有咗國安法仲要有國安條例，筆者會先同大家分享下以下新聞。
可能好少人留意到，國安條例通過後，其實仲有攬炒、反動份子喺度搞搞陣，根據專門「針對中國」嘅自由亞洲電台報道，基本法第23條（國安條例）通過後，海外首現提倡「自決」嘅組織，由香港前「學生動源」召集人鍾翰林牽頭成立，講到明想分裂中國，仲話要喺聯合國提倡「住民自決權」（self-determination），「要求」種種權利；呢個組織另一創辦人Rex就聲稱，基本法第23條立法後「言論空間收窄」，佢哋提供渠道畀香港人討論「未來出路」。恕筆者坦白，佢哋只係提供「死路」畀人就真！
香港國安法好，國安條例也好，試圖將香港從祖國分裂出去，必然犯法，鍾翰林佢哋搞「自決」或「港獨」組織，然後話提供渠道畀港人「討論」，如真係有香港市民同佢哋「討論」、加入佢哋，咁先唔講咩所謂香港出路，支持佢哋嘅港人肯定進入「死路」，因為參與呢種違法組織活動，都好可能違法；見到呢種謀害香港人嘅行為，就令筆者想起潛逃政客許智峯煽動人投白票，然後香港有人「照跟」，最後被告兼被定罪，鍾翰林佢哋同許智峯一樣，都係專陷害「同路人」。
言歸正傳，香港國安法或者國安條例所針對嘅，就係一系列危害國家安全、社會安定嘅罪行，用相反思維去諗，若然香港無相關法律，筆者肯定仲有唔少反中亂港嘅人喺度搞「港獨」、搞分裂，喺維護國家安全法例嘅震懾下，至少喺香港範圍可以盡力確保香港穩定；而有人若喺外國搞事，佢哋將來會否、如何承擔責任筆者先唔講，但佢哋想挑動港人參與其中，亦肯定唔會好似以前咁容易。
讀者們應該仲可以上網睇到相關報道，筆者睇完嘅想法就係「一派胡言」，首先係佢哋根本就唔係咩「英殖港人」，而係純粹係一班潛逃到外國或者喺外國生活嘅「港人」，筆者諗唔到點解佢哋喺聯合國有「任何實體權利」；再者，佢哋話自己要有「執政的準備」，筆者完全覺得係一個笑話，呢番說話之前都有反對派政客講過，結果？結果就係呢啲政客沒有好結果！講到自己咁正義，筆者建議鍾翰林不如返嚟香港投案再講！
日前（22日），首宗涉嫌放置或引爆爆炸性裝置、管有手槍及串謀謀殺執法人員嘅反恐案件喺高等法院開審，當中有部分被告已經認罪，據傳媒報道，控方案情指：
「2019年12月8日民陣舉行『國際人權日大遊行』，各被告連同其他人串謀在隊伍途徑的軒尼詩道英皇中心附近，放置一大一小炸彈，當中威力較大的一個可在半徑400米範圍造成傷亡，裡面載有約150顆鐵釘。控方說他們計劃用小炸彈引誘警員到場，之後在高處的槍手會向警員開槍，迫使他們向大炸彈的方向後退，繼而引爆大炸彈，待有警員受襲受傷，就可以實行『全民執槍』。」
睇下最近喺海外成立嘅「自決組織」，再睇下兩、三日前開審嘅反恐條例案件，質問、疑問點解香港要有維護國家安全法律嘅境外勢力或政客，其實你哋問緊乜？不如直接啲，反問「香港有維護國安全法例，我哋（美西方）以後點搞局？」
收藏
取消收藏
分享
