文/稀思路
黑暴運動時，各路攬炒派人士有一招重複使用，就係不論情況，都會話所有嘢都係「政府錯」，暴徒打砸搶燒，話係警察執法過嚴；正義市民被火燒，都可以話係因為受害市民「多事」、「幫政府」。其實，美西方勢力抹黑特區政府甚至中央，所用嘅都係同一招，而且亦係不斷重複！上周五（19日），七大工業國集團（G7）外長與歐盟高級代表喺意大利開會，會後就發表聲明，「再次」就香港通過基本法第23條立法表示憂慮，但筆者更憂慮，G7又喺度玩集體抹黑，事實係，佢哋過往紀錄亦都唔好，有唔止一次為香港暴徒遮風擋雨嘅「不良紀錄」。
筆者講嘅，全部都係有根有據，2019年8月係黑暴運動最為熾熱嘅一段日子，當年8月26日，G7就喺落幕時發表咗個聯合聲明，「重申」1984年嘅《中英聯合聲明》嘅存在同重要性，呼籲「避免暴力」，又話支持香港「自治」，呼籲各方冷靜。2020年6月17日，即係中央為香港制定、實施香港國安法前，G7又有聯合聯明，要中國重新考慮制定香港國安法嘅決定，仲稱立法威脅基本權利同自由。
喺以上G7嘅行動，各位讀者睇到啲咩？黑暴運動由2019年6月開始，一直愈燒愈旺，暴徒行為香港以至國際社會都睇到，G7如果真係要發聲，點解唔係譴責暴徒暴力，只係叫「各方冷靜」？G7領導，連基本判斷力都欠缺？去到2020年6月，其實黑暴運動仲未止息，G7點解想阻止中央制定香港國安法，又再一次唔譴責街頭暴力？只有一個合理解釋，就係G7根本就偏向支持反特區政府嘅一方，而且由當時起，就喺度妖魔化香港國安法。
事情發展到今日，G7又為香港就基本法第23條立法發聲明干預，其實就係一貫佢哋嘅反華立場，之前反對香港國安法，依家就反對《維護國家安全條例》，所以喺佢哋嘅聲明，就聲稱國安條例「將使在香港生活、工作和經商變得更加困難，並削弱香港人與更廣泛的世界保持自由和開放交流的能力。」但筆者要問，國安條例點影響生活、工作同經商呢？
就算G7講幾多次，「是錯永不對，真永是真」，國安條例立法，就如中央為香港制定香港國安法，並無影響市民生活、工作或者經商，法律唔係G7所講嘅咁，事實國安條例亦唔會影響市民以至來港人士生活，例如，一個喺香港經商嘅人，會唔會無端端從事危害國家安全嘅破壞活動？又會唔會無端端觸犯叛亂等罪行？香港嘅法制，就係部分G7國家行嘅普通法制，要將一個人定罪，係要「毫無合理疑點」呢！
G7國家，包括美國、德國、英國、法國、日本、義大利、加拿大，而歐盟就係非正式成員，如果佢哋對香港嘅國安條例有疑慮，咁佢哋自己嘅維護國家安全法律又係點？如果讀者之前有睇過筆者文章，美國、英國等國家嘅國家安全法，筆者都討論過，如果G7擔心香港嘅國安條例，筆者係咪又要擔心下其他人喺美國、英國、日本以至加拿大嘅自由同基本權利？外交部駐港特派員公署發言人講得啱，七國外長同歐盟高級代表以不實和偏頗言論，刻意誤導公眾，大放厥詞，係「典型的政治霸權和虛偽的雙標」。筆者最後仲想講句，當G7同歐盟用一隻手指指住香港特區時，其實有四隻手指係指住自己呢！
收藏
取消收藏
分享
