文/稀思路
4月15日係「全民國家安全教育日」，今年係「總體國家安全觀」提出十周年，點解要強調「總體國家安全觀」？因為部分人可能會狹義地認為國家安全就係國土、政治安全，但其實，國家安全範疇或涉獵面甚廣，社會安全、經濟安全、文化安全、網絡安全以至生態安全等，都係國家安全嘅重要構成部分，所以我哋維護國家安全，要全面更要方方面面。筆者想特別提提，外部勢力由黑暴運動開始，幾乎就冇停止抹黑過特區政府甚至中央，最近美加又喺更新旅遊提示上面大做文章；今個「全民國家安全教育日」，筆者覺得我哋由外部勢力威脅去睇「總體國家安全觀」頗為合適。
繼英國同澳洲後，美國同加拿大政府分別因應香港完成《維護國家安全條例》立法而「更新」對香港嘅旅遊提示，其中美國國務院加入描述，稱香港國安法實施以來「大幅限制公民自由」，又指國安條例生效會「進一步」限制公民自由，又提到香港國安法同國安條例嘅域外效力。至於加拿大，除咗一樣提到域外效力之外，就指出國安條例嘅最長羈留日數等。
萬變不離其宗，外部勢力抹黑香港國安法或者國安條例，最常見嘅抹黑就係話國安條例「限制自由」，我哋又要不厭其煩地反駁，國安條例根本就冇限制自由，因為自由權利要喺合法嘅情況下行使，煽動、煽惑、竊取國家秘密以至勾結境外勢力等，明顯唔係「自由權利」；即使喺經常提倡自由嘅西方國家，都唔會容許有呢啲「自由」，如果讀者想了解多啲，可以了解下英國《國家安全法（2023）》。
而講到域外效力，筆者更加想直接指出，一定或適當嘅域外效力，係國家安全法嘅國際標準，有分析就指出過，多年來美國先後通過《間諜法》、《國家安全法》、《煽動叛亂法》、《關於制裁洩露國家經濟和商業情報者法令》等等，種類繁多，包括國安法在內嘅美國大部分法律都有「域外效力」。另外，美國仲進一步發展出「效果原則」，只要發生喺國外嘅行為喺美國境內產生「效果」，不論行為人國籍或住所等，美國都可以行使管轄權，美國真係可以大膽講句「問你怕未？」
從以上例子，讀者可以睇到，好多外部勢力抹黑香港國安條例嘅內容，其實佢哋自己都做緊，而且做得更多兼更深，喺呢個情況下，筆者真心唔明白，到底佢哋批評香港啲乜？再舉一個例子，關於延長羈留日數，喺英國《國家安全法（2023）》，英警權力擴張，可以喺無搜查令情況下執行搜查，亦可以喺冇逮捕令下逮捕並羈押嫌疑人，最長可羈押14天；另外，大部分罪名有域外效力，英國政府可以根據國安法指控並逮捕外國公民。
今次抹黑香港嘅切入點，係美加等國更新旅遊提示，讀者可以諗下，除咗許智峯呢類潛逃政客（擺明違法兼反中亂港），一個喺英澳美加嘅公民或者商人，佢哋會唔會無故觸犯國安條例或者香港國安法？會唔會無違法行為而來港經商、學習或者旅遊，但又無故跌入法網？講嚟講去，其實就係外部勢力又喺度搞事，所以外交部駐港公署發言人所言極是，有關國家的旅行提醒無視客觀事實，惡意貶損香港國際聲譽，企圖阻撓正常的商業和人員往來。我們強烈敦促有關國家立即停止污衊抹黑香港國安立法，立即撤銷不實旅行提醒，調整相關錯誤評級，移除阻礙同香港交流合作的絆腳石。
收藏
取消收藏
分享
