文/稀思路
過去幾次，筆者都不時撰文提到《維護國家安全條例》，亦反駁過唔少美西方勢力嘅謬論，話題比較嚴肅，所以今日筆者決定「輕鬆啲」，同讀者講下、笑下黃店。最近，窮途末路嘅「大渣哥」餐廳，被爆出欠租150萬元，被業主喺門口貼追租告示，並要入稟封舖，而「渣哥」創辦人蔡強榮夫婦，就回應如果真係頂唔住就只有提早結業。黃店結業，合乎常理，之但係「大渣哥」作為「黃店龍頭」之一，佢如果結業係特別抵死！
喺大約一個月前，「大渣哥」欠租嘅事已經開始流傳，當時「大渣哥」創辦人、前港姐冠軍譚小環老公蔡強接受訪問時，就話近兩年生意入不敷支，「希望撐得一個月得一個月」；話鋒一轉，蔡強就話因為員工要養家，供應商都一樣面對困難，所以選擇員工同供應商優先，一路以嚟直至今日，一元都冇欠過佢哋。
從以上說話，讀者睇到啲咩？筆者就睇到黃店、黃人混淆是非嘅「能力」，成單新聞，都係講緊「大渣哥」欠租，而且係爭人過百萬元，蔡強話畀人聽無欠員工、供應商錢，咩意思？即係員工、供應商錢唔欠，只欠業主錢就Okay？呢種筆者話「你咁對A君唔啱」、佢答「我無對唔住B君」嘅口氣，真係好符合黃人轉移視線嘅作風。
「大渣哥」之所以有今日，其實定局一早已經寫下來，蔡強同譚小環喺2014年創立魚蛋店，一直發展同壯大，係因為佢哋嘅政治立場，更正確嚟講，係支持違法「佔中」同黑暴運動；「大渣哥」隨住攬炒派興起而發展，最後又隨住攬炒派消亡而面臨結業，成件事好合理，當初黃人因為「熱情」連食飯都要去返黃店食，但今日啲黃人可能上深圳消費嘅時候，「大渣哥」豈有生存之理？
值得一提嘅係，其實毛記葵涌附屬公司都係「大渣哥」嘅股東，仲同蔡強佢哋打官司，官司嘢筆者唔評論，但係黃人之間，唔係兄弟姐妹咩？唔係齊上齊落咩？一講到錢就反面，黃人之間嘅道義，真係「薄過紙」喎！讀者再回想下，諸如黑暴藝人阮民安之流，其實都係「錢好緊要」，甚至係專呃自己人。
2020年香港國安法實施後，黑暴分子冇運行；《維護國家安全條例》上周六刊憲生效，更加係堵塞咗唔少國安漏洞，仲想食住條「黑暴水」搵食，無可能！筆者就覺得，蔡強唔交租仲聲大夾惡，業主一定要追到底，對「欠租黃人」仁慈，對方都係會反咬一口。仲有一點，筆者成日認為，唔講政見，搞餐廳最基本係食物、服務質素，「大渣哥」執完一間又一間，除咗因為再食唔到「黑暴水」仲有咩其他原因？心照啦！
收藏
取消收藏
分享
