【點新聞報道】李思捷主持的節目《思家大戰》，本周日（13日）將播出新一集，由「夫妻檔」汪明荃及羅家英攜手率領的「荃家高瑩俊」隊，成員包括粵劇拍檔謝曉瑩、郭俊亨及負責音樂的高潤鴻，對戰林夏薇率領的「寵愛Pet Pet」隊，成員有姜大衛（John哥）、周嘉洛、徐榮及古佩玲。
家英哥在節目中無時無刻吼準機會發表「愛姐宣言」，當思捷問到他對粵劇與電影的看法時，家英哥即賣口乖謂：「我拍電影就家肥屋潤，娶到老婆啦」，引發全場尖叫；之後被問到夫妻愛情「保鮮」法，家英哥捉緊阿姐玉手：「因為我哋經常拖手仔行街」，更忽然向阿姐高呼「I love you」，嚇至阿姐打冷顫謂：「嘩！毛管戙！」
全程情緒高漲的家英哥亦有甩轆，事緣思捷追問家英結婚多久，家英還未開口阿姐已瞪大雙眼望到實，嚇至家英哥即時口窒：「我係09年結婚嘅，14年喇。」當回答「問咗100位已婚男士，梗係覺得人哋老婆有咩好過自己老婆」時，家英哥竟脫口而出答「慳家」，令阿姐即時成為被狙擊對象，思捷更起勢拿阿姐身上衣服作話題，阿姐即精靈拋出一句成功扯開話題。
阿姐今次求勝心重，還未正式開始遊戲前，已擺明車馬恨贏：「我擔心我遊戲玩唔掂，點算呢，（向着思捷）你有冇貼士呀？我想今晚攞你嗰五萬蚊and禮品呀。」阿姐及後更應思捷要求，向John哥單眼撒嬌求讓賽，氹得John哥開心表示：「我攞咗畀你哋！」
John哥的幽默度亦不輸「荃家」，當思捷問John哥與成班後生仔合作拍劇有何挑戰，John哥一本正經說：「咩挑戰啫？學嘢咋嘛。大把嘢學啦，佢哋講嘢行路都唔同」，更隨即做出「縮頭縮腦」動作。而回答「人哋老婆有咩好過自己老婆」時，John哥毫不畏懼飛出「脾氣」二字，思捷追問其太太李琳琳是否脾氣不好時，John哥再度視死如歸謂「絕對係」。
（點新聞特約記者陳惠芳報道）
相關報道：
收藏
取消收藏
分享
