點新聞 ｜ 每日點新聞 點解香港事

今日要同大家講嘅黃圈新詞，就係「黃泉生活圈」。

早前講過「黃色敲詐圈」，但隨着時間嘅過去，依家又有新嘅叫法，「黃泉生活圈」，因為黃圈生意慘淡圈內人人自危開始鳥獸散，再死撐留低就如走上黃泉路「死路一條」。話說黃絲為與社會對抗，自組一個虛擬嘅生活圈，嘗試建立經濟實力，用夢幻般烏托邦模式去吸引小商店加入，以為可以分化社會，打擊經濟。

唔少加入後賺到盆滿缽滿嘅小店就當然大力支持，但亦有唔少吸唔到「財氣」嘅小店就忍氣吞聲，又唔敢脫離，驚被人搞。

不過，近日終於有借口搞脫離啦！事關香港國安法正式通過，黃絲中人個個震顫，不斷喺網上妖魔化國安法嘅同時，又有唔少黃店公開要同黃圈割席，大做文章喎！先有龍門冰室/瓏門冰室宣布退出「黃圈」，又有所謂龍頭黃店「光榮冰室」拆「流膿牆」，其他好似「嚐賞」、「壹碗壹碟」、「開餐Dine Inn」等等有樣學樣。只係拆牆唔脫圈就多鬼餘啦，無果堆廢紙邊個知你係咩店，同脫圈無分別㗎，呢啲都係自欺欺人想呃市民嚟消費又怕被黑暴報復嘅啫。

其實從呢排「和你lunch」、「七一非法遊行」檔期滿滿但no show嘅非法遊行活動睇得出，普羅市民已經相當清楚「沒有犯法唔怕立法」嘅道理，對黃圈所講嘅瘋語瘋言就越嚟越唔相信，自然就唔會支持佢哋嘅經濟圈同活動啦。

講到尾，無財無合作，黃色經濟圈崩潰都只係時間問題，斗膽呼籲改名叫「黃泉生活圈」，睇下有無新客源囉。