【點新聞報道】混血肥仔（曾達恩，Tommy）主理的多媒體頻道，繼古天樂後，前日（16日）第六集客串演出嘉賓是華人置業行政總裁兼執行董事甘比（陳凱韻）。
甘比在《人生好似好很難》第六集中正是扮演甘比自己，故事講述她在餐廳用膳後，因為信用卡機故障同時身上沒有現金，所以無法埋單，碰巧見到丁丁戴着她公司的員工證，便向坐在隔籬檯的丁丁求助：「小姐，唔好意思呀，我想問你借200蚊Cash得唔得呀？」但丁丁不知道眼前人正是自己老闆，還以為對方是「借錢黨」騙子：「由細到大呢，屋企人都教我，唔可以亂借錢畀人，仲要係陌生人，你咪陌生人囉！」搞到甘比一臉無奈，只好極不好意思地自報身份：「其實我就係Miss Kim Kim……」
丁丁有眼不識泰山，還寸嘴地向甘比說：「你係Miss Kim Kim，我係鄭秀文呀，我嚟緊開演唱會，你畀2000蚊我，我畀握手位你吖！」之後仲補多句：「一係你問周圍啲人，睇下佢哋會唔會落搭啦！」到見到飾演甘比助手的劉展翹（Jackie）趕到為老闆解圍，丁丁才意識到出事，便立即一邊捉住甘比手袋一邊道歉：「我傻咗呀，我隻眼有問題呀！」
事件告一段落後，丁丁在公司搭升降機時再次碰見甘比，甘比好快就直認記得她：「上次你講得好啱，唔好亂借錢畀人係啱㗎，公司請到你呢啲員工，好好，冇得頂！」愈又諗愈悔不當初的丁丁好快就在褲袋掏出200元鈔票問：「如果我依家借畀你，會唔會太遲呀？」最後，甘比似是教女般微笑着回答：「好遲喇，埋咗張單喇，唔使喇，同埋你後生細女唔好成日咁暴躁，得閒去學下鈎織啦，OK？」不少網民睇完之後激讚甘比，更有人留言：「甘比好nice，演得好好」、「有埋甘比真係好crazy」、「甘比份人都幾搞笑同幽默」。
其實今集除了甘比之外，還有另一位重量級「串星」！故事結尾，有一把香港人極為熟悉的聲線，截停了在銅鑼灣街頭的丁丁，擺明是「借錢黨」的他問：「小姐小姐，可唔可以借廿蚊我買嘢飲，因為我冇帶銀包，但係又好口渴，定啲嚟，你咁靚，我唔會走你數㗎喎！」鏡頭一拉開，原來借錢的正是不時在IG出現的「星爺背影」，他接過丁丁手上的20元後立即跑走，丁丁回神後才驚覺中伏，場面既搞笑又驚喜。
（點新聞特約記者陳惠芳報道）
相關報道：
收藏
取消收藏
分享
