【點新聞報道】由張達明監製的《狀王之王》中的「至尊計狀元才」章節，大玩計中計中計。
案件劇情反轉再反轉，加上角色大兜亂。先有古明華飾演賤格版王浩信，本尊的他在玩自抽鬧爆「王浩信」：「一聽呢個名就知佢係一個蛇頭鼠眼、尖酸刻薄、卑鄙無恥、賤賤格格、跛腳岩巉、成頭瘌痢、5呎差2吋嘅死剩種！」其他演員亦會齊齊玩變裝，王浩信以《奪寶奇兵》造型上陣，除了黐大粒癦兼說話時黐脷筋外，還會搞笑地化名「張振朗」；子羚孖住王子涵黐鬚化身山賊，金剛則會搽白塊面化身女人型。
問到為何化名好友名字「張振朗」，王浩信笑言：「『張振朗』呢個名原本就係劇本寫嘅，唔係我自己加嘅，林子聰導演話因為古明華個角色叫咗王浩信，所以就將我個角色叫張振朗。」講到化身「張振朗」後要黐脷筋講對白，王浩信坦言有難度：「因為劇情要講啲人唔可以認得我係宋世傑，所以無論講嘢同動作都要有啲唔同，之前已經玩過口音，所以最後選擇咗『黐脷筋』，事前都要練吓點樣講對白。」
姚子羚除了會黐鬚化身山賊外，還會以性感露腰裝上陣化身土耳其女郎幫黃浩信洗白白，向來身形Fit爆的子羚大晒健美馬甲線，非常吸睛。子羚笑言很喜歡造型：「呢個造型係我成套戲最靚女嘅裝扮，原本仲Sexy啲，但依家都有露腰㗎！」問到拍攝前有否戒口以保最佳狀態？子羚說：「冇特別忍口，當時已經好瘦，因為拍攝呢套劇之前要練打戲，所以一路拍一路瘦，唔需要特別戒口，反而係需要增肥！」另TVB社交網釋出相關場口花絮片段，王浩信笑言要剝衫拍出浴戲感到尷尬，在旁的林子聰即拉高衫大晒肚腩緩和氣氛，之後子羚登場時王浩信又大讚「省鏡」，子羚聞言即風騷大跳肚皮舞，又不時問人「我靚唔靚呀？」，場面搞笑。
（點新聞特約記者陳惠芳報道）
相關報道：
收藏
取消收藏
分享
