【點新聞報道】湯洛雯及何依婷兩位準人妻今日（27日）出席婚假服務頒獎禮。對於日前馬國明在新劇《新聞女王》中跟何依婷在後樓梯激咀，靚湯直言有收看該幕，但沒有呷醋。
靚湯說：「我覺得好好笑，當然冇呷醋啦，我初入行已經睇佢拍呢啲鏡頭，最記得係佢喺《On Call 36小時》同楊怡（現名楊茜堯）咀。」靚湯又說：「馬國明喺劇入面角色花弗，但佢現實唔係，所以入唔到戲，同埋佢唔好同我講嗰啲對白，我會嚇親。」她稱對馬國明拍親熱戲沒有太大感覺，反而馬國明佔有慾強，介意她拍咀戲，她甜絲絲表示：「我寧願佢係咁，好過佢唔在意我。」
而靚湯被指與馬國明婚前密密搵銀，她笑言：「托賴，多多都唔拘！」她為了慳錢更變成精明師奶。靚湯說：「我成日講價，問可唔可以平啲，馬國明覺得係一筆小數目，我就覺得慳埋可以去多次旅行，不過我哋籌備婚禮時已經講明唔可以嗌交，所以而家都冇嗌過交。」靚湯又指雙方父母年紀老邁不宜飛太遠地方，故她和馬國明選擇了一個亞熱帶地方舉行婚禮，至於婚禮何時舉行？靚湯只笑笑口表示：「總之我哋聖誕會喺香港過。」日前馬國明預告會在婚禮上跳舞，靚湯坦言已請來舞蹈師教二人跳舞。
（點新聞特約記者陳惠芳報道）
相關報道：
收藏
取消收藏
分享
