稀思路/筆是機場
最近，香港一間中學發生咗一件事，非常值得社會反思，話說荃灣聖芳濟中學喺舉行恆常嘅升旗禮時，有十幾個學生疑因為仲留喺學校嘅雨天操場、食早餐甚至無站立，校方批評有關行為係唔尊重升旗儀式，懲罰相關學生停課三日。事後，當然係有一批「黃人」衝出嚟為學生護航啦，但係唔尊重升旗禮以至係國旗區旗，有可能會構成刑事罪行，我哋係咪要諗下校方咁做，係用心良苦呢？一班「黃人」表面幫人，實質又係唔係害人先真？
對於相關學生嘅行為，為佢哋開脫嘅人會話佢哋「只係細路啫」、「無站立就要罰」以至係「校方打壓」等等，但筆者想講，校方咁做，正正係為咗涉事學生好，因為今日學生喺校內唔尊重升旗、國旗以至區旗，校方可以適當地懲處同教導佢哋；如果佢哋喺校外有類似行為，而有人選擇舉報俾執法部門，到時就未必係停課咁簡單。所以，一班以為自己幫緊班學生嘅「黃人」，其實係間接害咗人，仲要以為自己好正義。
喺今次事件，我哋亦再一次見到攬炒派或者「黃人」嘅政治操作，明明聖芳濟當日因為校門有指示牌被毁壞所以報警，但就有人借機造謠，稱校方「報警拉人」；其實，如果校方係報警拉涉事學生，大家會認為涉事學生只會「停課三日」？「黃人」謊言，層出不窮，可能呃到唔會認真思考嘅其他「黃人」，但心水清如筆者嘅市民，點可能俾呢種「黑暴式」謊言呃到呢？
令筆者覺得最可笑嘅地方在於，之後仲有人「吹水」，話聖芳濟出現退學潮，筆者想請教下，如果係真嘅，有幾多人退學？係咪包括十幾名涉事學生？可能有人唔清楚，聖芳濟喺荃灣算係一間唔錯嘅中學，有資料更指學校係一間英文中學，學校有返咁上下實力，有人想借機攻擊、破壞學校？邊有咁易！
不問對錯，只問立場，係「黃人」由非法「佔中」到黑暴運動都解決唔到嘅問題，佢哋可能以為咁樣可以打擊到特區政府，但事實係，佢哋嘅做法只會害咗年輕一代，黑暴運動時有幾千個學生被捕，都係多得呢班煽風點火嘅人。喺呢度，筆者必須重申無論係對待升旗、國旗以及區旗等，都要莊嚴地尊重儀式，否則出問題嘅時候就後悔莫及。
有啲人喺旁邊煽動，但大家睇下前排港足對緬甸嘅足球比賽，有人敢喺警方面前侮辱國歌咩？當然唔敢，呢啲人最叻就係「犯法事等其他人做」，自己呢？當然係戴個頭盔，行埋一邊撥火啦。筆者覺得，呢種人比起行差錯嘅年輕人，更加可恨，有句說話叫「殺君馬者道旁兒」，亦非常適合用嚟形容呢啲煽風點火嘅「旁觀者」。
相關閱讀：
收藏
取消收藏
分享
