周潤發獲浸會大學頒授「榮譽人文學博士學位」,他今日（7日）出席頒授典禮，穿上博士袍並戴上口罩上台接受戴上博士帽後,全場掌聲祝賀，他鞠躬致謝，再步行往致詞台致辭。他在台上說：「大家好，我係周潤發，今日好高興，好日子，立秋，得到這個獎萬分之高興，多謝浸大頒贈呢個博士學位畀我。」
66歲的周潤發在台上致詞,同大家回顧其演藝生涯，並說他少時是在戲院度過。他說：「講讀大學，我阿媽有意見，60年代，已經帶我飄洋過海咁去讀香港社會大學，那時我只得10歲，當年60年代嘅香港社會非常簡陋，我哋住嘅地方就喺舊唐樓，一間唐樓就住咗30幾人，環境非常惡劣，對一個鄉下仔嚟講，壓迫感好大，所以好多時間我都係走咗去睇公餘場，5點半嗰時前座只需2毫子，後座4毫子，其實戲裏面做乜，我都唔知，我鍾意歎冷氣嘅,我年少嘅時候就在戲院過。」
到70年代,周潤發形容他報讀了「無綫大學」,那時拍劇由早到晚,見得最多不是媽媽,而是鄭裕玲,「畢咗業之後不停拍戲，不停講對白，由朝早06就拍到26（凌晨2點），出外景講對白，返到錄影廠又講對白，瞓緊覺都係講對白，9年來日日咁過，我拍咗咩真係唔知，我見得最多，唔係我阿媽，係鄭裕玲，（全場爆笑）一化妝就見到佢，日日陪住我，係返屋企就bye bye，但聽朝又見，唔見幾個鐘又見到佢，真係，鄭裕玲係陪我喺電視台最多嘅藝人。」
到了80年代，1984年開始不少新導演出現，周潤發表示在1986年幸運地遇到吳宇森導演找他拍戲，吴導的戲令他每日都在槍林彈雨下過，他笑言：「我1日開幾萬發子彈都有。」電視、電影跨越20年他都沒有休息，笑言如果不是有首映禮，根本沒有機會看回自己的作品：「那時早、午、晚三組戲，很多人問我點分角色，我話我去到着邊件衫就識做戲！」之後發哥又去讀夜校學英文，1996年拍了第一部外語片，他笑言又是開槍拍戲，對白不多，又謂：「死得啦！第一套戲就節哀順變，所以跟住我在荷里活發展都知係點，都係節哀順變。1999年李安導演找我拍了《臥虎藏龍》，一拍拍到依家，我覺得電影好好玩，是好有趣行業，每一個角色挑戰性好大，以前因為要搵食，所以要付出，是逼出來，好多謝香港人畀到好多鼓勵、包容我，好多謝香港這個地方畀到好多愛我。」
（點新聞記者陳惠芳報道）
收藏
取消收藏
分享
