【點新聞報道】衛詩雅（Michelle）憑電影《破·地獄》「郭文玥」一角橫掃各大電影頒獎禮，成「七料影后」。早前她再下一城，於「第38屆大眾電影百花獎」中斬獲「最佳女主角」，成為首位獲得該獎項的香港女演員。昨晚（29日）英皇娛樂為她舉行慶功，英皇集團主席楊受成及太太陸小曼、英皇娛樂行政總裁霍汶希（Mani）、歐陽震華、方中信、曾比特（Mike）、溫碧霞、沈震軒（Sammy）、何佩瑜（Jeana）、VIVA成員Ada、Macy及VALC、黃明德（Dark）、黎展峯（Andy）、洪助昇（Aiden）、阮雅（Bonnie）、劉若寶（Polly）、黎峻（Kenneth）及黎紜蔚（Vivian）均有出席，場面墟冚。
慶功宴高潮之一，就是楊受成親自推出蛋糕並送上花束，全場歡呼聲不絕。蛋糕設計十分有心思，最上層有Michelle拎獎的公仔，更用電影菲林由下至上貫穿整個蛋糕，底層則印滿Michelle跟家人、朋友的溫馨照片，Michelle見到蛋糕十分驚喜，「嘩！點搬過嚟㗎個蛋糕」頻頻道謝。
合照期間，歌手黃明德（Dark）及黎展峯（Andy）即席為Michelle清唱《破·地獄》主題曲《普渡眾生》，點知二人唱到甩嘴兼笑場，場面搞笑，Michelle即笑住話：「等等先，仲唔係《少林功夫好嘢》嗰首呀，哈哈。」其間Andy又臨時充當司儀搞氣氛，Michelle笑着對Andy說：「如果我唔係結咗婚，我搵你做我結婚嗰個……」話未說完，Mani即接口：「結婚嗰個老公呀？」弄得全場大笑，氣氛高漲。
隨後Michelle於台上發表感言：「首先多謝公司英皇一路以嚟嘅栽培，多謝老闆楊博士，同埋多謝所有今日嚟到嘅朋友仔，陪我一個咁開心嘅慶祝嘅晚宴，希望大家繼續身體健康，同埋大家大紅大紫！」語畢全場即歡呼聲不絕，場面溫馨又熱烈。
相關報道：
收藏
取消收藏
分享
