【點新聞報道】移英港人的「玻璃心」，究竟可以脆弱到咩地步？近日有移英港人發帖，抱怨「點解有啲人咁唔想見到其他人夢想成真」，仲指責香港朋友「想睇人移民失敗」。帖文一出，隨即引來一班同路人圍爐，將香港朋友的關心或者無心一句，無限放大為「妒忌」、「睇人仆街」，玻璃心碎滿一地！
有移英港人在社交平台threads發文，大吐苦水稱自己移民時感受過被朋友睇死，「點解有啲人咁唔想見到其他人夢想成真，甚至件事根本同自己冇關係，都想睇人失敗？我移民嗰陣，真係感受過有朋友好似想睇我『移民失敗』」。反之，移英人士亦好想證明自己生活美滿，「另一邊又會見到有啲移咗民嘅人，好想證明留喺香港嘅人生活得唔好」，樓主感嘆話「每個人都只係揀自己想過嘅生活」。
帖文一出，即時引來大批移英港人圍爐，有人話留港朋友係「心理投射」、「眼光窄」，甚至直指「香港人鍾意睇人仆街」。有人甚至搬出「廿年朋友」嚟講，話對方睇唔過眼自己在英國過得好，「有一個仲要識咗超過廿年。最後佢睇唔過眼我去咗英國過得好過喺香港時。又證實咗我冇妒忌佢結咗婚，佢應該覺得好無面，面對唔到我，仲block埋我tim」；亦有網民直言「笑我走，嗰啲希望佢過得唔好」。
不過，有心水清的網民就一針見血指出：「大部分係啲移民撚喺度歌頌自己嘅決定幾英明。」亦有網民揭穿呢班移英港人的虛偽心理：「好多人心態係你過得好即係代表我輸咗，要日日吹奏自己無揀錯，先催眠到自己唔係食緊屎。」
說到底，如果在外國真係過得咁幸福、咁「夢想成真」，又何須對香港朋友隨口講兩句的說話如此介懷。
（本文為作者觀點，不代表本媒體立場）
收藏
取消收藏
分享
