文/稀思路
國際關係，波譎雲詭，有時吊詭嘅程度，完全超出稀思路同讀者嘅想像。話說，日本首相高市早苗日前到美國紐約出席聯合國大會，喺佢抵達美國機場嘅時候，出現咗有啲靈異嘅一幕，佢步出機艙後舉手、揮手致意，甚至躬身招呼，但當時嘅停機坪極為冷清，現場圖片所見，佢揮手嘅方向其實冇咩人，到底佢睇到啲咩，向邊個揮手？一個政府首腦，去到美國「冇人接待」，又代表啲咩？
根據傳媒報道，喺高市早苗抵達美國時，好可能係連一個美國官員去接待佢都冇，未見有人為佢鋪上紅地氈，亦冇美方接待隊伍。筆者覺得，成件事最有趣嘅，係呢件事本身都冇乜人知，但係日本官方自己發出嘅圖片，就戳破咗高市早苗嘅被「接待方式」，同中國元首相比，高市早苗明顯受到冷待。
講返正題，高市早苗之所以急急腳去美國，係想同美國總統特朗普會面。高市早苗嘅緊張，並唔係完全無道理，因為日本作為美國喺亞洲最重要嘅「棋子」，高市早苗打從心底怕自己、日本畀特朗普忽視，於是急飛去美國見「主子」，但恕筆者坦白，對美國嚟講，同中國加強合作明顯重要於作為「棋子」嘅日本。
當高市早苗去到聯合國大會時，竟然呼籲删除《聯合國憲章》中「敵國條款」，不再標籤日本為敵國。中國外交部發言人表明，今年係聯合國成立81周年，亦係東京審判開庭80周年。當年日本以承認軍國主義罪行，接受《聯合國憲章》全部內容為前提加入聯合國。《聯合國憲章》中敵國條款係重要制度安排，旨在防止法西斯主義、軍國主義再度對國際和平與安全構成威脅。中方仲敦促日方以史為鑒，深刻反省，以實際行動取信於亞洲鄰國和國際社會。
之前筆者分析過，高市早苗搞軍國主義復辟、維持極右勢力支持嘅方式喺日本執政，注定會失敗。當中原因好簡單，高市早苗搞軍國主義，首先會將亞洲鄰國（被日本侵略過嘅）都得罪晒，外交上肯定先會輸一仗。與此同時，將焦點放喺軍事、外交，亦意味高市早苗冇將執政重點好好放喺國內，喺國際、國內兩個局面皆輸嘅情況下，高市早苗可以支撐幾耐，都係一個疑問。
喺高市早苗上任之初，唔少人都吹捧佢「民望高」，但讀者們可以睇下最新數字，根據《朝日新聞》日前進行嘅最新民調，高市新內閣支持率為51%，較上月跌2個百分點。68%受訪民眾認為任命涉捲入政治獻金醜聞人員存在嚴重問題，又有57%受訪日本民眾認為高市內閣需要加強改善對華關係。
從高市早苗喺聯合國發言，以至佢不斷主動搵特朗普問中美元首會晤嘅事，似乎高市早苗仍然將外交問題放喺首位，但係，從中美達成嘅八點成果共識可見，特朗普明顯更為重視中國；唔係唔理日本，當高市早苗步步進逼，美國有時都要「hea」（敷衍）下佢。擺在眼前嘅事實，就係強如美國，都要更加重視同中國嘅合作、管控分歧，如果高市早苗仲以為日本係「亞洲最強」、要搞軍國主義，筆者真係唔知道，佢嘅支持率一直跌落去，佢仲可以支持幾耐。有時候，一個首相或政府首腦，不重實務又四處挑起事端，只怕唔會有咩好結果。
收藏
取消收藏
分享
