文/稀思路
因為外部勢力近年不斷干預香港事務，包括喺法庭審理嘅國安案件，所以喺唔同文章當中，稀思路一直反複強調，外部勢力不應亦不可干預香港事務，除咗係基於國際之間互不干預嘅原則，當中仲有個核心邏輯，就係外部勢力要包庇嘅，正正就係犯法、危害國家安全嘅人。最近，歐盟、英國、所謂國際組織以至媒體等，都藉香港嘅司法案件，想插手香港事務，除咗予以譴責外，筆者覺得，我哋要反對到底，絕對唔可以畀佢哋得逞。
例如，歐盟就發表所謂年度報告，而英國就係聯合國人權理事會造謠，兩者都針對香港國安法進行抹黑，甚至要求「無條件」釋放國安罪犯。另一邊廂，黎智英兒子黎崇恩就好密集地喺外國接受訪問、到國會「作證」，要求「釋放」其父親黎智英，甚至想喺美國搞一場「跨黨派施壓」。
與此同時，國際律師協會人權研究會、亞洲律師網絡等，都喺度玩同一套路，要求「無條件」釋放「支聯會」案嘅鄒幸彤，而無國界記者組織就以「報告」形式抹黑香港新聞自由。其他向來針對中國、香港嘅國際媒體，類似嘅套路，都係要求「釋放」黎智英等人。
呢啲抹黑，關鍵詞包括香港國安法、黎智英以至鄒幸彤等等，如果我哋逐點分析，就會發現外部勢力嘅干預，係同一時間有「聲勢浩大又蒼白無力」嘅感覺，相當難得，點解咁講？「聲勢浩大」，係指佢哋好努力喺外國玩大合唱；而「蒼白無力」，係佢哋嘅無理要求，根本在法在理，都站不住腳！
先講香港國安法，從法律層面睇，唔止香港特區以至國家，美國、歐洲國家自己都有形形色色嘅維護國家安全法律，當中美國嘅國家安全法律，可以話係又辣又多，以一個國家或者特區都必須維護安全嘅前提，香港國安法絕對有其合法性。從事實層面睇，正正因為有咗香港國安法，香港先可以止暴制亂，一套穩住香港局面嘅法律，係懲治極少數（黎智英等人），而保護咗絕大部分香港市民嘅安全同利益。
由此引伸落去，黎智英、鄒幸彤等人，並唔係因為「民主」、「自由」、「合法活動」、「傳媒報道」等因由而被定罪，而係因為佢哋確切地觸犯咗國家安全法律，例如高呼自己「為美國而戰」嘅黎智英，佢確實有勾結外國勢力；至於鄒幸彤，其實「支聯會」嘅綱領、行動，意思都好明顯，筆者亦諗唔到有邊個法治成熟嘅地區，係容許有人顛覆國家政權，就如喺英美，國安法之辣，條文之多，都可能喺香港特區之上。
除咗祖國對香港，國際間好難有無緣無故嘅關愛，當外部勢力高呼要「釋放香港反對派」時，佢哋最關心嘅，始終都係透過一個又一個反華代理人，破壞香港安寜甚至係攻擊中央，如果畀佢哋得逞，只怕香港仲有排亂。己所不欲，勿施於人，當英美都有而且會執行國家安全法律，但另一邊廂卻唔想香港特區政府執法，呢啲係咩道理？如果學似外部勢力，我哋係咪要美國政府、法庭「放人」，無條件釋放所有國會山莊暴動嘅人呢？讀者聽落都覺得唔合理？但外部勢力就係做緊類似嘅事！
收藏
取消收藏
分享
