文/稀思路
上星期，特首李家超發布咗香港首份五年規劃以及2026年施政報告，綜觀各界意見，除咗讚好之外，有分析就指出香港五年規劃同施政報告兩者配合得宜，前者提出大規劃、大方向加唔同指標，後者就透過實際政策，落實香港五年規劃嘅願景，香港開始為中長期發展，作出更有系統嘅謀劃同實踐。不過，社會都係有個別聲音，唔抵得亦唔想政府好，諸如「計劃經濟」、「大學城搞唔掂」等聲音仍然存在，但其實，香港有五年規劃，根本就不等於計劃經濟。
關於呢個問題，李家超亦公開表示，香港首個五年規劃並非「計劃經濟」，相反係一個規劃過程，將政府政策與市場力量相結合，讓每個人都能找到最佳途徑，以最理想嘅效果達成目標，同時喺過程中保持靈活性，並喺情況超出控制時作出調整。
有心攻訐政府嘅人，總會找到「千萬個藉口」去攻擊政府同五年規劃，但稀思路想講，有長遠規劃，根本就唔係等同於計劃經濟。有規劃嘅經濟體，係對未來經濟、民生等發展，制訂中長期嘅詳細計劃，但係屬於計劃經濟定係市場經濟，區別方式應該喺「市場運作」上；觀乎香港嘅情況，交易、買賣由市場機制決定，而且香港仲繼續被評為全球最自由經濟體，點可能係計劃經濟？
再者，借用李家超嘅話，特區政府發布香港五年規劃，係希望將政府政策與市場力量相結合，筆者理解，就係將政府嘅規劃同政策，更好地與市場配合。例如，喺北部都會區建設，政府提供政策、土地以至稅務支援，並為不同發展區作出定位，之後專屬公司、進駐企業點發展同壯大，就交由市場去發揮。有人不斷以計劃經濟等攻擊特區政府，其實道理同事實上，都站不住腳。
喺香港五年規劃同施政報告發布後，大部分意見都支持、認同李家超以至特區政府嘅規劃，但係一啲意見，永遠都想「對着幹」，以北都大學城為例，近日網上就有唔少聲音質疑大學城，有部分甚至係已經「走佬」去外國嘅人。抹黑聲音筆者唔重複，但香港發展大學城，底氣在於香港有五間世界百強大學，而且本身有基礎科研、成熟金融市場以及完善普通法制度等優勢，唔係某啲人「分析」幾句，就能夠將北都大學城貶低。
進一步去講，北都大學城除咗大學，其實已經升級為教育、科技、產業、人才以及城市建設嘅「一城五元素」，筆者認為，香港要發展多元經濟，北都以至大學城就係重要契機。睇勻香港五年規劃以及施政報告，仲會睇到特區政府提出唔少惠民措施，包括喺房屋方面要基本解決劣質劏房問題，以及繼續將公屋嘅綜合輪候時間縮短。當一啲黑心人士不斷喺香港五年規劃同施政報告上「挑錯處」，社會各方可以理性、客觀地睇兩者，特區政府喺短、中、中長期，喺配合國家「十五五」規劃嘅情況下，已為香港謀定出路；要改善經濟、令市民活得更好，呢個亦係有為政府應該有嘅系統謀劃。
收藏
取消收藏
分享
