文/稀思路
如果讀者們呢幾個月有留意到黎智英、「支聯會」等案件，唔難會發現一件事，就係外部勢力依然在干預香港！佢哋用嘅藉口林林總總，但主調就係「爭取自由啫」、「和平活動呀」等等，基本上唔會太多提到案件細節，例如有人呼籲外國制裁香港，有人煽動其他人顛覆政權，因為呢啲行為，只要危害到國家安全，放諸其他地方，都係不能接受。近日，就到英國政客「出手」，佢哋今次要包庇嘅被告，就係前香港眾志秘書長黃之鋒。
早前，黃之鋒已經喺法庭承認「串謀勾結外國勢力危害國家安全」罪，據報最高刑罰可以係終身監禁。一班英國政客、跨黨派國會議員同所謂人權組織，日前就發出公開信，要求首相貝安德（Andy Burnham）就案件採取行動，據報，聯署人仲包括香港末代港督彭定康。
呢班「聯署人」講啲咩呢，大抵意思，就係想屈香港國安法受到濫用，「和平民主活動」被刑事化。筆者睇到，佢哋仲將《中英聯合聲明》都搬埋出嚟，話要求英國政府都信守承諾。其他內容，筆者就先按下不表。
任何事情，首先唔應該離開事實，讀者都可以再睇下黃之鋒嘅案件，除咗佢本人已經認罪嘅事實之外，根據控罪內容，黃之鋒喺香港國安法實施後，表明自己唔會放棄立場、唔會放棄「國際線」，而佢有份爭取嘅「國際成果」，就係美國針對、「制裁」香港嘅官員。十分簡單嘅道理，叫外國政府搞自己國家嘅官員，如果喺美國、英國，該當何罪？
當英國政客擺出一副「我最正義」嘅姿態時，不如筆者將喺公開資料睇到嘅英國法律，同讀者們開心Share下。2023年年中，英國通過最新《國家安全法》規定，任何人（冇錯係任何人）無論在英國本土或任何境外其他地方從事行為導致或意圖對任何「資產」造成損害，而該損害「對英國國家安全或利益造成不利」影響，且符合「外國條件」，則該人將干犯「破壞罪」，刑罰可致終身監禁。
另外，若有人公開且持續地呼籲外國對其本國實施制裁，甚至親自前往外國進行此類活動，損害本國經濟利益，顯然已涉嫌觸犯「破壞罪」和「外國干預罪」相關條款。相關法律仲規定，任何人不論在英國境內或境外從事或具意圖作出有「干預成效」的「被禁止行為」，且符合「外國條件」，就會構成「外國干預罪」。
睇睇英國嘅法律，如果黃之鋒喺英國犯下相同罪行，一樣會被告，一樣有可能被重囚。情況換到喺香港，英國政客就話「和平民主活動」，呢班政客係認真定講笑？雙重標準到呢個地步，仲扮正義？
最後，筆者想講講《中英聯合聲明》，事實係基本法頒布、實施後，《中英聯合聲明》已經完全退出「歷史舞台」；而且，《中英聯合聲明》唔會亦冇可能禁止中國、香港特區政府維護國家安全。一班英國政客，喺自己國家立下嚴厲嘅國安法，然後話香港國安法有問題，好明顯係佢哋有問題先真！香港嘅問題，唔需要英國政客勞心，佢哋如果得閒，不如搞下自己國家啲建設先，英國失學、失業、冇培訓嘅青年，接近100萬人，顧好自己先啦！
收藏
取消收藏
分享
