文/稀思路
近日，多年來反中亂港、煽動顛覆嘅「支聯會」終於迎來審判，喺佢哋煽動顛覆國家政權罪成嘅案件中，「支聯會」被罰款150萬元，死不悔改嘅鄒幸彤被判囚7年3個月、李卓人被判囚7年，早已認罪嘅何俊仁，就被判囚5年2個月。對於呢次判刑，唔少人都話係「遲來的正義」。「支聯會」反中亂港多年，一班被告終於要承擔罪責。其實關於「支聯會」，仲有一條較為隱蔽但重要嘅線索，就係多年以來，佢哋除咗煽動市民犯罪，根本一直都係外部勢力嘅「亂港好拍檔」。
喺9月12號，即係「支聯會」案宣判第二日，有傳媒將「支聯會」三頭目勾結外力嘅劣跡報道出來，好多資料顯示，「支聯會」以及各被告，都曾經受到美國嘅政府或機構支持，包括由「美國國家民主基金會」（NED）給予資助，根本就係一條清晰嘅「黑金政治鏈」。
從公開資料睇，喺香港國安法生效之後，有指「支聯會」佢哋繼續接受「美國國家民主基金會」等外部勢力嘅捐贈同資助。值得留意嘅係，李卓人做「支聯會」主席嗰陣，同時係「職工盟」嘅秘書長。有文件披露，「職工盟」自1994年起，每年都有向「美國國家民主基金會」旗下組織申請資助，多年來累計超過1000萬港元，涉及款項可以話係天價。李卓人自己仲表示過，「我勾結外國勢力是很公開的。」
至於冥頑不靈嘅鄒幸彤，曾經擔任「國際特赦組織香港分會」執委及公司董事，呢個組織同「美國國家民主基金會」關係密切。據報鄒幸彤曾經同「港獨」組織頭目梁天琦一齊參加過反華組織搞嘅「族群青年領袖研習營」，甚至出席過支持「台獨」及「藏獨」組織嘅活動。至於何俊仁，佢有份創會嘅「華人民主書院」，多年來亦得到「美國國家民主基金會」資助，何俊仁本人亦同黎智英等人關係密切，甚至可以話關係非比尋常。
可以睇到一個好明顯嘅事實，就係「支聯會」以及三名被告，都唔單止喺香港社運圈「活躍」咁簡單。喺佢哋背後，全部都發現到外部勢力嘅支持，甚至捐助。有人可能對「美國國家民主基金會」（NED）較為陌生。其實呢個組織，就係由美國國會撥款，喺美國國外扶植政治團體、煽動工運，甚至與不同地方嘅「顏色革命」都有關係。
筆者認為，正常嘅香港市民唔會「無緣無故」反中亂港，其實係畀李卓人、鄒幸彤等人以「自由」、「民主」、「大型活動」之名煽動咗。各位讀者可以諗下，專門喺組織下面嘅工作人員，啲錢喺邊度嚟？定期舉辦唔同嘅大型活動，錢又從何而來？喺反中亂港陣營，細心睇會發現一條明顯嘅「黑金鏈」，包括由外部勢力提供嘅資金甚至培訓，等佢哋可以用最低嘅成本喺香港挑動矛盾。2019年嘅黑暴運動，香港嘅反中亂港份子同外部勢力裏應外合，結果就令香港陷入從未有過嘅動盪。
審視「支聯會」案，要睇被告們嘅不法行為，仲要睇佢哋背後嘅外部勢力。一班人長年累月、無間斷地反中亂港，當中一定有古怪。從頭到尾，「支聯會」唔係要記錄什麼事情，而係一心想煽動、推倒特區政府甚至國家政權。「支聯會」禍香港多年，時辰已到，夠鐘「找數」！
收藏
取消收藏
分享
