【點新聞報道】譚詠麟（校長）一連10場《譚詠麟與您「刻骨銘心」世界巡迴演唱會——終極篇》昨日（11日）正式揭幕。當晚出席嘉賓包括文化體育及旅遊局局長羅淑佩、劉鑾雄夫婦、曾志偉、陳友、鍾鎮濤及女兒鍾㦤、鄺美雲、任達華夫婦、李克勤夫婦及陳貝兒等。
校長透露，這次排練了200首歌，希望盡量滿足歌迷要求，並表示會「盡力而為，量力而為」演出。他解釋：「量力係相對嘅，唔係淨係講我，有好多歌迷都係。因為我見到好多歌迷，由孭住書包嚟睇我演唱會，到今時今日好多都成家立室，甚至唔係孭書包，係孭拐杖嚟睇我演唱會，真係好感動，多謝你哋！」
其後，校長站在哥爾夫球車上繞場演唱《遲來的春天》等早期金曲，歌迷相當熟悉，演唱會大部分時間都是全場大合唱。歌迷的熱情令校長十分感動，唱到《一生中最愛》時，他一度哽咽，全場歌迷大叫其英文名「Alan」。校長感觸說：「能夠有咁多咁好嘅歌迷支持咗我咁多，你哋真係好唔話得。喺40幾年前我已經企喺呢度，到今時今日好多嘢都變咗，唯一我覺得冇變嘅係你哋，多謝！」
演唱《Don’t Say Goodbye》後，校長再次感謝歌迷多年來的支持：「從大家不斷灌溉，先得到養分，可以茁壯成長，去到今時今日我會好好收藏。」接着他表示演唱會已經結束，並不設Encore部分：「嚟緊演唱會已經結束，開心party會繼續，玩幾耐就睇大家反應。」歌迷聽罷興奮得全場企起身，跟校長一齊開party，大合唱《你知我知》等多首金曲。
其後，校長突然邀請台下欣賞的李克勤上台。克勤甫上台即感動說：「我咁大個人第一次睇演唱會喊咗幾次。」他認真續說：「我代表今日現場嘅觀眾朋友，我好想感謝譚詠麟先生喺我哋嘅歲月裏面，畀咗我哋咁多好嘅歌，（曾）志偉坐喺我前面，我哋係一路睇一路喊嘅。」演唱會尾聲，校長演唱必唱謝幕歌《講不出再見》後，再次被歌迷感動，說：「頭先真係太感動，太令人《刻骨銘心》。希望跟住落嚟最後一隻歌，最後一隻我好尊敬嘅歌，呢隻歌將我帶到全球有華人嘅地方都認識我，就係靠呢隻《愛在深秋》。」
（點新聞特約記者陳惠芳報道）
收藏
取消收藏
分享
