文/稀思路
美伊戰爭，斷斷續續，雖然中間有停戰過，但通常隔一陣，美國又會突襲伊朗，戰事一直打落去，美國耗不起，佢嘅盟友更加係叫苦連天。近日，戰爭似乎出現過轉機，甚至有可能結束，但係咪真呢？9日，美國總統特朗普就表示，相信美伊戰事會喺11月，即係喺美國中期選舉後「立即」結束，因為德黑蘭試圖「影響選舉」，甚至稱對方「不顧一切地想要影響選舉」，事實係咪咁？
根據特朗普嘅講法，話伊朗方面希望透過扶植「無能」嘅人進入國會，之後由佢哋去放任伊朗，畀佢哋擁有核武；所以呢，特朗普認為美國中期選舉後，戰事就會即刻結束。特朗普仲話，油價亦會喺中期選舉後立即回落。不過同時，佢都承認唔會再尋求同伊朗領導層以談判結束戰事，但仍然口硬，稱伊朗「剩下的領土已經唔多」。
對於特朗普嘅講法，稀思路一個非常直觀嘅反應，就係特朗普「吹得就吹」！先講干預選舉問題，首先係除咗特朗普本人所講，從其他渠道睇嚟，似乎都見唔到有伊朗影響選舉嘅明顯跡象。諗得再深層次啲，有邊個美國政客「聰明」到會去同伊朗合作？如果美國本土有政客同伊朗一方有往來，仲可以喺美國政界立足？
至於油價問題，特朗普擺出一副姿態，就係叫美國民眾「相信佢」，但理性啲睇，點相信呢？之前突襲伊朗，話伊朗好快會投降；中途搞唔掂，又話同伊朗會達成協議；到最新講法，話對方會影響選舉，中期選舉後就「冇事」喇。平心而論，呢場戰爭係「不必要戰爭」，動機、目標等等，都十分之唔清晰；將心比己，如果作為伊朗一方，領導人被殺，又被瘋狂轟炸，其實好難唔還擊。
近日，美國嘅《華爾街日報》就引述官員消息，話多名白宮高層，都私下話畀特朗普聽，伊朗可能喺美國封鎖及軍事施壓下，繼續抵抗，戰事可能會一直拖到佢第二個任期結束，即係新總統喺2029年1月宣誓就職為止。特別可以留意，如果呢種分析係正確嘅，即係油價等問題會一直困擾住美國，仲可能會影響到2028年嘅美國總統大選，同時對美軍資源造成壓力。
幾日前，筆者喺網上睇到篇報道，話林肯號連同艦載機聯隊，每日運作成本約550萬美元，以約269天任務粗估累計近15億美元。由此推論，計埋其他軍事成本，美國依家仲日日喺度燒緊銀紙。喺近代史嚟講，美伊戰爭係標誌性嘅，因為美國「證明」畀全世界睇，原來軍事實力最頂尖嘅國家，係無法戰勝一個中等國家。更深刻問題在於，以往美國嘅全球霸權，仲可以維持幾耐？一場本應係美國「騷本錢」嘅戰爭，變成泥沼式拉鋸，真係唔知點收科。
收藏
取消收藏
分享
