【點新聞報道】近日有移英港人在社交平台發文，勸誡中年同路人回流香港前務必三思。樓主直言，年輕時即使失敗亦可從頭來過，但人到中年背負着整個家庭，「自己已經冇本錢再試錯」，帖文隨即引發網民熱烈討論。
該名移英港人在Threads發文指出：「講真，如果人到中年，諗住由英國回流香港，我真係勸你諗清楚先。」樓主隨後以身邊朋友的親身經歷為例，說明回流需要謹慎的原因。
樓主透露，該名朋友移英數年，期間不時抱怨國外生活枯燥乏味，出門都不知可以去哪，並感嘆「始終香港先係屋企」，最終決定回流香港。回流首月，朋友心情極佳，每日享受茶餐廳、奶茶及與舊友聚會玩樂，深信自己「返嚟真係啱」，第二個月朋友開始求職。然而，到了第三個月便要四處打聽招聘消息。直至第四個月，朋友才驚覺最大的難關並非香港本身，而是自己已不再是二十多歲。
樓主分析中年求職的窘境，直言：「人工唔敢要求太高，要求高咗人哋嫌你貴；要求低啲，又覺得自己做咗咁多年，點解要由頭開始。」然而，現實中一個家庭每月均面臨固定開支，包括租金、伙食、水電、子女教育及交通等。樓主感嘆：「冇工返嗰陣，你先會發現，原來『返香港』唔等於『有飯食』。」
樓主補充，懷念故鄉、朋友和美食屬正常情況，但不應單憑一時衝動便貿然回流，他坦言：「年輕嗰陣輸咗，大不了重新嚟過。但去到中年，背後已經唔係自己一個人。回流唔係返屋企咁簡單，係重新計一次人生條數。最怕唔係返嚟之後發現香港唔似以前，而係發現自己已經冇本錢再試錯。」
帖文引發網上熱烈討論，不少認同樓主的網民指出，移民與回流均需一定的財富積累和深思熟慮，「其實有錢先好移民，起碼有錯嘅權利」、「人生好多重大決定行錯一步就好難再返轉頭……條路自己揀，與其怨天尤人，不如自我安慰」。
亦有同路人提及回流後職場適應及求職經歷的尷尬，坦言：「真係㗎，所以搵到工先返會好啲，但係其實都驚，返到嚟雖然有份工，但係做落發覺唔習慣或者根本唔再適應香港個工作文化同埋強度⋯⋯然後一個唔覺意過唔到試用期都係大x鑊」、「見工都唔敢同人講自己回流，但唔講又怕人哋睇你有幾年無做嘢記錄懷疑緊係咪入咗赤柱」。
此外，亦有網民嘲諷：「呢啲人，我唔明當初點解會移英？」、「會唔會一開始去英國已經係錯？」、「坐這山，望那山，一事無成」。
收藏
取消收藏
分享
