文/稀思路
早前，稀思路寫過一篇文章，分析比較英國同香港嘅就業情況，確實係香港好得多，有人話返到香港「搵唔到工」，未必係事實之全部，之後，有朋友問筆者，講到英國狀況，有冇更多資料可以補充或者分析。今日，筆者就再講下英國，尤其係青年嘅就業狀況，用數字說話，最簡單亦係最實際。
根據英國媒體報道，英國國家統計局最新數據顯示，今年4月至6月，全國有大約98萬名16歲至24歲青年冇接受教育、就業或培訓（即係之前已經講過嘅「Neet」），佔相關年齡層嘅人口大約八分之一。其實呢個數字，比起高峰期超過100萬人，已經算係稍稍回落，但讀者們可以想像到，英國青年當中，每八個就有一個冇返學、冇嘢做兼無培訓，絕對係一個唔可以忽略嘅數字。
相關數字嘅成因，可以話由多個因素組成，既有英國經濟嘅因素，亦有創新科技帶來嘅影響，例如根據英國求職網站嘅數據，英國喺今年7月，提供畀畢業生嘅職位空缺，只有8383個，比去年同期嘅15397個，減少咗接近一倍。據報，有關數據係自該網站喺2016年開始記錄以來，記錄到最差嘅水平。喺2017年，喺畢業生職位嘅高峰期，有關網站嘅職位超過55000個。
深究原因，因為唔少僱主認為，搵唔到理由去為應屆畢業生增加招聘職位。有分析認為，數字或情況未必真係咁差，因為有啲職位雖然未必「專為畢業生而設」，但最後都可能會請返畢業生。英國同其他地方一樣，畢業生會受到AI浪潮等衝擊，但職位空缺由5萬幾個變成幾千個，情況確實係值得憂慮。
過去一段時間，筆者喺網上睇過唔少分析，有人劍指英國政府，話英國政府一邊想幫青年就業，一邊又喺僱主國民保險供款、最低工資方面做調整，造成「鼓勵就業又增加僱主成本」嘅矛盾政策，影響僱主們聘請畢業生或青年嘅意願。問題係，畢業或投身社會後，第一份工作嘅經驗同履歷十分重要，當英國青年連進入職場都有阻礙，98萬個「Neet」一族，呢個數字就唔難解釋喇。
一直留意英國嘅新聞，仲會睇到英國政府似乎想推動「再工業化」，並會聚焦喺先進製造、AI與潔淨能源等方面。筆者唔敢講推動「再工業化」冇用，如果放喺全球化嘅框架下，一個工資高、成本高嘅國家，係唔係咁容易推動「再工業化」？假設東南亞較為先進嘅工廠，工資係英國嘅十分之一，英國「再工業化」繼而出售嘅產品，邊個會高價買？
至於推動AI產業等，理論上一定唔可以話英國有錯，問題只在於，英國要推動嘅AI發展，到底係向邊個方向走？筆者都認同，一個發達國家，理應朝向高產值、高增值嘅產業去發展，如果太多青年失業，情況就好難搞。讀者們睇下呢篇文章，再諗下「英國回流香港搵唔到工」嘅講法，就會知道香港雖然都有發展問題，但覺得「英國好過香港」呢種極端說法，可以休矣！
收藏
取消收藏
分享
