文/稀思路
如果有留意美伊衝突，讀者們會發現一件事，就係無論美國如何瘋狂地轟炸伊朗，伊朗始終頑強地反擊，美國空襲伊朗一下，伊朗又還擊一下，美國都係「攻不下」伊朗。所以，美國近期就有新發明，要展開一輪「經濟D-Day」（「經濟版諾曼第登陸」），當中成效各方可以觀察，但之前講到咁容易處理伊朗，依家停止攻打，美國算唔算係「另類投降」？
早前，美國財長貝森特（Scott Bessent）就發文，宣布展開「經濟D-Day」，會有新一輪嘅經濟制裁。外界最為關注嘅內容，係美國唔止喺經濟上加大施壓力度，甚至同伊朗有商貿往來嘅都會「制裁」，即係「二級制裁」，引起外界嘩然同批評。
美國嘅套路，大概就係「我打唔贏你，都繼續搞你」，但所謂「D-Day」，係咪言過其實呢？大家所認知嘅「D-Day」，例如係諾曼第登陸，係解放，亦係正義之戰；但美國喺伊朗事件上係侵略者，稱自己行動為「D-Day」，似乎係言過其實，將自己定位擺得太高喇。
除咗行動代號，行動本身更有問題，當初美國喺以色列唆擺下，冇諗過後果就攻擊伊朗，殺人哋領導人，炸咗伊朗幾個月，依家仲玩經濟制裁，「還有王法嗎？」筆者想講，美國空襲手段會引起反擊，「D-Day」都會遭遇反彈，最後結果，可能都係美國自己承受返。伊朗高層已經警告，如果美國持續推動經濟封鎖，伊朗可能攻擊波斯灣能源設施、擴大戰爭範圍，甚至重新檢討不發展核武既有政策。即係話，美國越係極限施壓，伊朗越係用力還擊。
睇返美國近況，最先進航母福特號失火要回國、林肯號又出現船員跳海嘅事件；另外，美國乏力繼續去攻擊伊朗，當中原因仲可能包括彈藥不足，喺七月底，智庫戰略與國際研究中心（CSIS）就估算，美國嘅愛國者導彈比開戰前大幅減少，而且薩德反導彈亦明顯減少。一個理論上係世界最強嘅軍事大國，打幾個月仗就「唔夠導彈」，點搞？
彈藥存量大減，會發生咩事？從進攻層面睇，係美國嘅攻擊力可能不如開戰之前；從防守層面睇就更悲觀，因為缺乏彈藥防空，伊朗用戰機、無人機以至飛彈去攻擊美軍時，就更難去抵擋。伊朗冇能力去攻擊美國本土，但美軍喺中東嘅基地，美國喺中東嘅盟友，都隨時喺伊朗嘅攻擊範圍內。
撇開所有立場，包括美國發動目標不明嘅戰爭，只要理性地去分析美以伊衝突，尤其係經過呢幾個月，大家都明白美國唔可能靠空襲擊倒伊朗，而且依家霍爾木茲海峽仍處於封鎖狀態，最好嘅解決方法，都係美國認命，根據國際規例，同伊朗展開談判。無論係「D-Day」本身定所謂二級制裁，都只會令各方損失更大。回顧歷史，美國喺二戰後軍事受挫，唔係第一次，相信亦唔會係最後一次，「Trump，收手啦！」
收藏
取消收藏
分享
