文/稀思路
上回，稀思路提到日本首相高市早苗內外受挫，先喺G7會議同美國總統特朗普有爭拗，然後喺國內嘅民望，又跌至上任首相嘅新低，分析高市早苗嘅極右、新型軍國主義姿態係路線錯誤。筆者唔止一次寫日本以至高市早苗，唔係冇原因，當年日本侵華，就造成中國軍民傷亡超過3500萬人，日本如果再走軍國主義路線，後患無窮，最近東京審判庭審記錄全譯本首次出版，當中內容亦係佐證、鐵證。
80年前嘅東京審判（日本戰犯受審），其實之前已經有英文版同日文版，點解仲要翻譯做中文版？全譯本主編之一、上海交通大學東京審判研究中心主任程兆奇就指出，東京審判與中國嘅相關度太高，佢不應讓只係少數能夠讀英文、日文嘅專家才能進入嘅檔案，而應當有一套中國讀者能夠方便閱讀、檢索、引用同研究嘅完整中文文本。
要翻譯東京審判，工程浩大，前後用咗10餘年時間，筆者從公開資料睇到，有幾點值得注意，例如講到1937年嘅盧溝橋，就提到日本單單喺1937年7月7日晚上，就殺咗數百人，死嘅除咗有中國士兵，仲有兒童、婦女以及無助嘅平民。
喺成個翻譯卷宗，日本侵華相關內容佔比較高，其中判決書專章，就從九一八事變、盧溝橋事變、南京大屠殺，到偽滿洲國傀儡統治、鴉片毒化，每項指控均有證人證言、實物證據、庭審記錄相互佐證。所以，日本侵華嘅罪證，絕對係鐵證如山，不容抵賴，當今日仲有日本右翼勢力試圖掩飾侵略罪行時，其實侵華、殺人、強徵慰安婦等歷史事實，日本「點抹都抹唔走」。
一般人認知，日本侵華都係由1937年開始，而譯本提供咗一個視角，就係起訴書嘅起點，唔係1937年，而係定喺1928年，指出「1928年以來，日本軍隊不斷地侵略許多鄰國的領土」，因為喺當年，就係日本謀殺中國東北最高行政長官張作霖嘅皇姑屯事件發生年份。仲有一點，就係相關內容肯定中國喺抗戰十幾年間，係世界反法西斯戰爭不可分割嘅重要組成部分。
雖然日本侵華已經係幾十年過去，但係日本嘅罪證，包括庭審記錄同佢嘅譯本，都清清楚楚記錄住日本嘅罪行。回想到中國嘅英魂壯烈犧牲，中國人唔單止要記住戰爭嘅經歷，仲要防止戰爭再度發生，保護好中國人民。當日本包括高市早苗政府喺度炒作中國威脅，想藉機擴軍同出售軍備，中國絕對唔會啞忍同坐視不理。如果日本執意要走錯誤嘅回頭路，就必須再為錯誤付上代價，依家高市早苗帶領日本全國走嘅軍國主義路線，筆者講白啲，肯定係「掘頭路」（無法通行的死路）！
（本文為作者觀點，不代表本媒體立場）
收藏
取消收藏
分享
