文/稀思路
最近，社會都喺度討論緊北部都會區發展，從政府、議員到傳媒，都好關心北都包括專屬公司嘅發展。筆者反而留意到一單新聞，就係高等法院原訟法庭本月18日頒令充公「屠龍小隊」隊長黃振強等三人共約68萬元嘅「恐怖分子財產」；律政司指出，「屠龍小隊」眾籌資金曾被用作資助或協助恐怖主義行為，部分資金已用於潛逃計劃及採購「軍火」。雖然相關案件已經審結，但法庭頒令充公其資產，再次提醒咗我哋，危害國家安全、發動恐怖活動嘅罪行，其實喺香港出現過，社會要繼續警惕，加強維護國家安全嘅工作。
根據報道，今個月18日，律政司向高等法院充公相關人士大約68萬元，因為其款項係用於支援當時嘅恐怖活動，雖然當中有人被判無罪，但亦曾喺Telegram信息中承認眾籌角色，不影響充公申請。三名被告人都缺席聆訊，法官亦喺同一日頒下充公令，並喺21日公布書面判詞。
稀思路留意到，網上有人話其中一名被告劉佩凝，其實喺法庭上「無罪釋放」，點解充公有佢份，事實上，佢喺法庭上因為控罪或其他因素被判無罪，唔代表佢無份參與過事件，律政司長已經明確指出，劉佩凝係「屠龍小隊」成員，喺另一被告指示下，深度參與同維持「籌款頻道」，為小隊行動招攬並處理資金；有證據顯示，劉佩凝喺管理籌款頻道以及收集與轉賬所籌資金時，都係按小隊其他人嘅指示行事，法律上係「恐怖分子聯繫者」（terrorist associate），咁律政司長要充公資金時，又點可能冇佢份？
關於「屠龍小隊」想殺警嘅案件，可能社會各界都開始淡忘，所以筆者就係要寫呢篇文，提提讀者們發生過咩事，一班想殺警甚至傷害無辜市民嘅人，先成立小隊，再接受軍訓，之後開始籌錢、買槍，再計劃喺港島一帶殺警察，如果唔係警方有線報以及提早行動，可能已經造成嚴重傷亡。
今次呢單充公個案，筆者認為有兩大啟示，第一係關於案件本身，一班人有試圖危害國家安全甚至殺警嘅行為，將佢哋依法拘捕、檢控係一回事，切斷佢哋資金鏈都係必需嘅，因為只要有被告用剩餘資金為非作歹，執法人員以至市民大眾安全就會馬上受到威脅，所以即使本身嘅案件已經結束，律政司申請充公相關人士嘅資金，係必需嘅動作。
第二，就係社會各方千萬唔可以忘記「屠龍案」，冇發生大意外，只係因為香港警方喺案發前就解除咗一場大危機，睇返「屠龍小隊」嘅犯案地圖，至少有兩個地方會擺炸彈，另外亦有槍手埋伏嘅位置，情況十分危險。維護國家安全，只有進行時，沒有完成時，大家要記住香港出現過「屠龍案」，教育界都要多理解案件，將佢化為教材，既教導學生唔好以身試法，亦要話畀佢哋聽，香港都有可能會出現極端恐怖活動！
收藏
取消收藏
分享
