文/稀思路
反中亂港禍首黎智英，日前被法院裁定三項罪名全部成立，當中包括串謀勾結外國勢力罪。從法理層面睇，黎智英喺香港國安法生效後，仍然請求外國「制裁」香港，罪成十分合理；從事實或觀察層面，黎智英除咗去外國唱衰香港，仲高調講自己「為美國而戰」，如果喺香港，要數勾結外國勢力排名榜，黎智英好難唔係「第一位」。偏偏，喺黎智英罪成之後，就有外國勢力要求「釋放黎智英」，一個人犯罪，而且係經法庭審判而定罪嘅，外國勢力包括G7外長，憑什麼喺度干預香港事務呢？
據報，G7外長就發表咗所謂聯合聲明，妄圖「立即釋放黎智英」，提到香港人權、自由與自治等狀況，聲稱黎智英案影響香港人權、自由狀況，甚至劍指香港嘅司法獨立同高度自治等。G7外長用一副「扮正義」嘅方式發聲，但筆者有個問題，G7外長嘅所謂聲明，理據何在？
喺黎智英案宣判前，筆者都預計到外國勢力會將案件同自由、人權等「拉上關係」，但即使要重複100次，筆者都係要講，黎智英案同自由權利，根本就冇關係！黎智英之所以被起訴，唔係因為佢係傳媒人或「維護自由」，係因為佢除咗煽動「抗爭」，仲公開叫外國政要等「制裁」中國同香港特區，即係叫其他國家「搞」自己國家，明顯係危害到國家安全。講咩自由、人權等，筆者真係唔知道，原來世界上有一種自由叫「危害國家安全」。
至於司法問題，其實，黎智英案審訊歷時接近兩年，審訊日數156天，喺審訊期間，黎智英同佢嘅辯護團隊，有充足嘅機會進行申辯，黎智英自己自辯都有幾十日，其他證人嘅證供連同證據等，全部都經過法官謹慎地驗證，最後喺冇合理疑點下，先將黎智英定罪。香港嘅司法系統，包括喺處理黎智英案時，仍然十分完好，甚至為咗公義，長期公正地處理黎智英案，比起英國對住示威者玩「快速檢控」，法治程度實在好好多。
當G7外長（美國、德國、英國、法國、日本、意大利和加拿大）抹黑香港時，筆者仲想讀者們睇下，其實G7國家本身，自己都有國家安全法律。例如美國，除咗有超過20部國家安全法律，如果係犯上顛覆政府罪，最高罰則可以監禁20年，據報如果係犯叛國罪，甚至可以判死刑。至於英國，其《英國叛逆重罪法》，一經定罪可被終身流徙。其他國家包括德國、加拿大等，一樣有國家安全法律，當西方國家普遍有國家安全法律時，香港有以及執行，又何錯之有？
除咗法律以及事實陳述，筆者想特別指出，黎智英由壹傳媒以及《蘋果日報》成立開始，其實就開始反中亂港，多年來反對派、攬炒派嘅反政府行動，黎智英始終如一，近乎從未缺席；一個人以「傳媒人」身份之名，行反中亂港之實，在法、在情以及在理，都好應該「找數」。而且，黎智英多年來荼毒咁多年輕人去違法「抗爭」，點解一個又一個畀佢煽動嘅人要坐監，而佢又可以有「特權」，G7可以叫政府「放人」呢？過去多年，黎智英未正式「找數」，只係時辰未到，而家時辰到喇，不論G7點樣叫囂，黎智英都要為自己言行負責，為破壞香港嘅惡行「找數」，犯法就係犯法！
收藏
取消收藏
分享
