文/稀思路
最新報道指出，壹傳媒創辦人黎智英被控違反香港國安法嘅案件，將會喺周一（15日）上午裁決，即係審理接近兩年嘅案件，星期一就會有結果。越係臨近判決，就會有越多「聲音」出現，揚言要求法庭「釋放黎智英」。不過，筆者覺得社會大眾甚至國際社會都必須明白，黎智英案件唔係單純「政治事件」或「爭取自由」，而係涉及勾結外國勢力、違反香港國安法，有人如果以健康等理由要求法庭放人，唔單止會令案件失焦，更係干預緊香港司法，所以相關概念，社會唔能夠混淆。
由於臨近判決，黎智英家人亦開始行動，例如黎智英女兒黎采，就投書到《華盛頓郵報》，聲稱黎智英嘅「抗爭歲月」已經結束，只係想平靜同家人度過餘生；當黎采接受有宗教背景嘅媒體訪問時，就話黎智英只係「捍衛自由」，「係好人、愛自由、愛真理」。
除咗黎智英女兒，佢個仔黎崇恩亦有出動、接受訪問，而特區政府亦發過新聞稿譴責指出相關報道歪曲事實，企圖抹黑香港特區，令公眾誤信黎智英羈押同醫療服務安排惡劣。新聞稿仲指，懲教署及相關單位處理黎智英的羈押安排時，同其他在囚人士一視同仁，黎智英嘅代表律師亦早已澄清，清楚指出黎智英喺獄中一直獲得適切嘅治療同待遇，有關媒體不實報道完全冇任何事實基礎。
黎智英女兒黎采，筆者唔想貶低佢言論，但有啲原則，筆者覺得必須說清楚，黎采從「女兒角度出發」，想佢父親黎智英獲釋，但係，呢宗係刑事案件，唔係純粹家庭或社會糾紛，話黎智英「抗爭歲月」已經結束，咁問題嚟喇，「抗爭」完，如果有犯法，黎智英需唔需要承擔罪責？如果年紀大能夠成為免責理由，咁法律就可能會變得不一致。
另一個問題係，黎采如果認為佢父親黎智英只係「爭取自由」，佢都應該睇睇而家已經公開嘅證據、事實或者傳媒報道，喺成場黑暴當中，黎智英乃至當時嘅《蘋果日報》，可以話係最為出力嘅推手，除咗經常喺關鍵時刻煽動市民上街，一次又一次美化暴力破壞社會嘅人，曾經直接/間接勾結外國勢力，甚至叫外國勢力介入/干預甚至「制裁」香港，先係案件嘅重點所在。女兒可能想父親獲釋，但法律終歸係法律，界線要清晰。
回看返曠日持久嘅黑暴，無論係反對派議員、青年、專業人士等，唔少都因為犯罪而負上刑責，讀者以至大眾可以諗下，如果黎智英喺黑暴前後有犯法，點解佢可以唔找數？黎智英係黎采、黎崇恩父親，其他犯法嘅人何嘗唔係有家人、有仔女或者有父母？撇除所有法律觀點或法治問題，筆者有更深一層嘅問題，喺成場黑暴，黎智英出力狂推反中亂港，佢真係可以、值得逍遙法外？當咁多青年因為受到煽動而上街，黎智英又有冇諗過，上街嘅人，都有家庭唔應該犯罪？做人，好簡單，就係要為自己言行負責，那怕係傳媒老闆，都係一樣！
收藏
取消收藏
分享
