文/稀思路
最近，有單法庭新聞關於選舉，有人煽動他人投白票或不投票，話說前中大學生會會長蘇浚鋒喺2021年立法會選舉時，轉載潛逃政客許智峯嘅帖文，之後被控煽惑投白票罪，當時裁判官裁定控罪合憲後，蘇浚鋒改為認罪，被判緩刑。筆者睇到案件嘅最新發展，係蘇浚鋒提出上訴後，被高院駁回，然後直接向終審法院申請上訴許可，喺呢單案件，讀者們睇到咩，筆者睇到一個關鍵名字，叫許智峯！
先唔評論有人就案件上訴到終審法院，當年成件案件嘅起因，就係許智峯喺2021年10月29日，喺Facebook發布帖文，提出所謂「如水計劃」，叫人喺選舉中投「白票」，其他人轉發佢帖文，其實客觀效果，即係都係一齊叫人投白票，蘇浚鋒好，另一個被告都好，就係畀許智峯陷害。近日，為禍人間嘅許智峯又有類似論調，係咪又想害人呢？
大約一星期前，專門害人嘅許智峯又再「出手」，一段又一段抹黑文字，筆者就唔轉述，講到最後，其實又係想煽動人唔去投票。如果同樣套用之前案件嘅邏輯，若有香港市民又再「錯信」許智峯，然後又轉發又叫人唔好投票，咁肯定又有人被許智峯害喇，筆者覺得，許智峯「始終」都能夠發揮佢嘅害人本色，咁多年來，竟然可以完全冇改變。
許智峯呢類人，包括今次又叫人唔好投票，佢嘅本色、本質真係冇乜變過，上次佢煽動人投白票，搞到有人被告、被定罪，事隔幾年，佢完全唔當係一回事，繼續煽動，其實佢有冇諗過，自己之前已經害過唔少人？依家立選又到，佢都係覺得可以繼續煽動，唔理支持者或香港市民可能會被佢煽動到？許智峯想攬炒嘅，唔止係香港，仲包括佢嘅支持者，為人極度自私。
講返今次場選舉本身，選舉氣氛熾熱，特區政府亦鼓勵公務員、各界投票，近日仲有大機構率先推出方便員工投票嘅措施，對於點解要投票，公民責任幾重要，呢啲重要因素筆者暫時唔講，有一樣嘢，已經非常值得市民包括筆者投票，就係我哋支持安全、穩定嘅香港，要用選票向破壞、唱衰香港嘅惡勢力說不。睇返幾年前嘅亂局，再睇香港今日嘅穩定，為香港穩定投一票，絕對值得！
如許智峯之流，佢哋一定唔會想香港好、選舉好，甚至會以破壞選舉為樂，因為喺佢哋眼中，如果香港唔係「跟佢哋想法去做」，就係有問題，但係，如果好似佢哋咁，其實立法會就會好似以前咁，拉布、衝擊、阻礙議會；許智峯嘅反對，恰好說明如果我哋支持議會正常運作，有效率地議事，更應該參與投票，睇返過去幾年，由基本法第23條本地立法，到處理劣質劏房嘅法案等，今屆立法會一一完成，我哋要支持立法會選舉，另一重要原因係，投票選出代表，先至唔會浪費手中一票。
收藏
取消收藏
分享
