文/稀思路
攬炒派部分政客有個特質，就係口口聲聲話自己有幾關心、做事幾為香港，但一有事呢，逃跑速度快到令人難以置信！最近，筆者喺網上睇到一則關於香港大律師公會前主席夏博義（Paul Harris）嘅新聞，呢個曾經「備受關注」嘅香港前法律工作者，喺英國出席活動時，就大放厥詞，抹黑特區政府、香港警察甚至中央，筆者嘅問題好簡單，夏博義將所有事嘅責任都歸因於特區政府以至警察上，咁黑暴分子呢？黑暴分子可以奉旨搞破壞？
日前，夏博義喺英國出席活動，佢嘅言論可以話係全方位抹黑香港特區，既抹黑香港國安法，又聲稱香港係「警察國家」，貶低愛國教育，甚至連《中英聯合聲明》都攞嚟講；喺公開場合，夏博義仲藉機稱讚幾個反對派被告，佢對香港嘅抹黑，非常「全面」，卻又非常偏頗！
筆者覺得，關於夏博義嘅抹黑，其實可以逐點擊破，關於香港國安法，無論係分裂國家以至顛覆國家政權等罪，其實法律條文清晰，法官處理案件時亦堅守法治原則，夏博義嘅意思，可能包括有政客被控國安法，問題在於香港國安法「有問題」，但呢種說法嘅法理根據薄弱；如果以黑暴運動作為考慮背景，其實夏博義嘅說法，同其他攬炒派政客一樣，都似係站在暴徒一方。
至於佢有意無意地批評警方執法，道理其實亦係一樣，夏博義等人嘅焦點放喺警方執法或執法權上，但一班反特區政府嘅人士，其實好少去批評或譴責暴力破壞香港，或者係喺立法會生事嘅政客。筆者換個角度，如果黑暴時唔係有警察執法，香港會變成點？夏博義可以探討下呢個問題，再思考下誰是誰非。
唔知點解，好多時英國政客講到香港問題，都會搬《中英聯合聲明》出嚟講，夏博義亦都唔例外，但筆者想指出，《中英聯合聲明》嘅內容，其實已經透過《基本法》喺香港完全落實，英國對香港，唔需要再聲稱對香港有咩義務同責任，香港嘅事係我哋中國人嘅事，英國包括夏博義等人，真係唔駛再多事。
關於夏博義，原來佢當年「着草」（潛逃）離開香港時，稀思路都寫過篇文，依家睇返，篇文章係指出夏博義當年應該有份創辦「香港人權監察」，當香港警方可能以涉嫌違反香港國安法而約談佢之後，佢知道自己可能正受調查，趁自己仲有護照在手，就遠走高飛。夏博義呢類人，成日將法律、法治掛喺口邊，如果自己涉及法律問題，就「走得咁快」，近日佢又喺高開場合抹黑香港國安法以至特區政府，有冇道理，係咪佢自己心中有鬼？筆者覺得，與其話夏博義係一個大律師，不如話，佢喺香港時，真正身份可能係一個攬炒派政客，呢個描述應該更為合適。
收藏
取消收藏
分享
