文/稀思路
拍過拖嘅人都知道，情侶之間分開，一刀切唔係最辛苦，藕斷絲連又斷斷續續嘅，先係最攞人命，今日一齊，聽日可能分手；聽日分手，第日又可能一齊返，剪唔斷，理還亂。將「談戀愛」呢個情況套落移英港人身上，其實情況都好痛苦，過去幾個月，由英國政府到在野黨，都就住移民政策有倡議，一時話「5+1」變「10+1」，一時又話要取消移民入境政策，成個英國政界，將移民舞來舞去，最新又有個講法，話移英港人唔使「10+1」，但要對英國經濟有貢獻，咁樣成日轉玩法，移英門檻明顯係「龍門任佢搬」，而一班移英港人，更加似係畀英國政府玩緊。
最近筆者睇到一篇評論文章，內容大致係以BNO移英嘅港人，理論上可以保留「5+1」永久定居計劃，不過，有說法就指，批出永居嘅條件有變，可能會將無經濟價值、對英國冇貢獻嘅人篩走，可能條件包括喺英國有工作、有交國民保險、冇領取福利、有中級程度英語水平同埋冇刑事犯罪紀錄等等，用常理去諗下呢啲條件，可能已經有部分移英港人唔合要求。
如果英國政府喺審批永居時一定會加辣，成件事就會好「伏」，除咗有網上評論指「有工作」唔知會唔會為收入設限，賺太少錢嘅會被篩走，讀者們留意下英語水平嘅要求，若然要達到B2級別嘅水平，上網話呢個水平係「一般來說這是進階者的水平，也稱為中高級」，有個對照表，稱B2級別大約相等於IELTS（雅思考試）嘅5.5至6分，6分呢個水平係唔算高，但喺香港，報讀碩士課程嘅要求，有啲科都只係要申請者IELTS有6分，如果移英港人英文水平唔夠，咁有五年喺英國生活最後又被篩走，其實就係用儲蓄去振興英國消費。
至於冇刑事犯罪紀錄嘅要求，其實係合理，不過，點解有啲人要移民去英國？有少部分係因為喺黑暴運動期間犯事，所以想移民去英國「重新開始」，如果英國政府落閘，呢班人點算？特別重要嘅位，係移英港人要滿足一系列要求，先可能最後取得永久居留身份，搵到錢、英文好、冇犯事等等，筆者就覺得，移民政策如果變成咁，其實英國政府已經無咩特別待遇畀移英港人，而係當做生意，你有貢獻就留低，你冇貢獻就走人。
喺黑暴運動時，英國有政客好強調自己對香港「仲有義務」，所以推出BNO「5+1」計劃嚟「幫」香港人，但依家全世界都睇到，其實英國政府係想縮，係想篩走部分移民；筆者一直都講，黑暴運動時英國等西方國家要「攞光環」，所以扮支持港人，依家唔需要呢個光環，甚至英國都要同中國修補關係，所以之後部分港人有冇得留低，就係睇一樣嘢——利用價值。冇利用價值嘅，可以返香港，又或者可以再試下去其他地方，重新排過條移民隊。
當有為數唔算少嘅移民咗去英國，而近期英國政府又想郁移英港人，理論上羅冠聰等人都喺英國，但呢班喺香港搞攬炒嘅政客，係咪應該勇敢啲企出嚟，大力批評同譴責下英國政府、在野黨呢？難道人去咗外國，就會自然地變得「安靜」？依家寄人籬下，唔敢示威、唔敢出嚟，完全變成外國嘅附庸？反對派或者攬炒派政客從來唔值得相信，因為去到最後，無論係潛逃、潛水（唔出聲），佢哋扮到幾正義，其實都係為咗自己。
收藏
取消收藏
分享
