文/稀思路
特首李家超今日（17日）發表新一份施政報告，當中亮點有成立「北都發展委員會」、建立「部門首長責任制」、加強人工智能應用以至修改外勞比例保本地就業等等，睇唔同媒體嘅新聞，外界最為關注嘅，似乎就係「部門首長責任制」嘅部分，筆者上網睇到，已經有媒體以「失職公務員可被扣糧、革職」為題，去講如果部門首長等失職，最嚴重係可以面臨咩後果。李家超推出「部門首長責任制」，不論外界點樣評價同解讀呢項新舉措，筆者係會用一個字去形容，就係一個「勇」字！
點解話李家超「勇」？雖然筆者以至讀者，都未必係政府中人，但由港英時代沿襲下來嘅公務員體制，用中性啲嘅講法，可以叫「官僚」，如果筆者用直白啲講法，其實公務員亦係政府施政嘅「一座大山」，司局長呢啲問責官員，有事就要問責，但首長級公務員呢？過去讀者們都好少聽過佢哋要問責，甚至乎係唔需要問責，依家李家超建立「部門首長責任制」，可以話知難而行，亦係十分有勇氣嘅表現。
李家超表示，自佢上任以來，積極推動政府與社會改革，發展經濟、改善民生，改變咗政府文化，建立「以結果為目標」嘅政府。其實，今次李家超推行「部門首長責任制」，正正就係進一步改變政府文化，司局長係問責官員，政府部門首長等就係執行政策嘅團隊，如果司局長要負政治責任，部門首長就應該負起行政責任。筆者曾經聽過有人分析，司局長有事要負責，但有時執行權力喺常任秘書長等身上，所以李家超今日推行新嘅責任制，就推動到無論係司局長定係部門首長，如果出錯或失職，就各自負起應有責任。
另一政策亮點，讀者們都可能睇到係成立「北都發展委員會」，但呢個「北都發展委員會」有咩特別之處？特別之處就在於，呢個委員會係由李家超本人去領導；即係話，如果要作出最高決策或最後決定，李家超係冇將個責任交畀其他人，而係由佢本人去領導或協商決定，呢個決定同建立「部門首長責任制」道理其實係一樣，李家超事不避難，如果北部都會區嘅發展問題需要高層次官員去解決，可以由佢或者司長、副司長去解決；如果公務員隊伍喺問責方面要加強，李家超亦願意挺身而出，做第一個提出解決問題嘅人。
喺施政報告發表前，社會就曾經吹咗一陣「風」，建議政府派發2000元消費券，指定市民要將消費券用喺本地消費，最終，特區政府並無採納建議。坦白講，派錢係最直接、可以節省思考嘅措施，但其實，筆者都唔贊成，而支持特區政府投資未來嘅方向。首先係現時公帑資源緊張，唔應該隨便再派錢或者派消費券；第二，則係如果公帑要最有效地使用，一定係用嚟投資未來，無論係人工智能、必要嘅社會福利等，將錢精準投放喺最需要地方，性價比先係最高！
有政策、有政績，有啲嘢係呃唔到人，例如公屋輪候時間，平均就由6.1年縮短至5.1年，如果公屋供應再增加，將來更有望縮短至4.5年。近年香港喺唔同領域嘅國際排名，包括香港金融中心地位、整體競爭力、人才競爭力、安全城市排名等都上升，其實以李家超為首嘅特區政府亦係用事實說話，由治及興嘅香港愈來愈穩，而特區政府嘅改革決心，明顯亦愈來愈堅定。
收藏
取消收藏
分享
