文/稀思路
攬炒派政客或人士有一個謬論，就係如果作出煽動、呼籲「制裁」等行為，通常都會話自己「冇犯法」，只係提出「倡議」、「建議」甚至係行使言論自由嘅權利，類似嘅論調，我哋唔難喺黎智英案入面發現，亦出現喺其他攬炒派人士身上。最近，因為呼籲「制裁」香港法官、檢控官而被通緝嘅香港國安法逃犯任建峰，就正式喺律師登記冊除名，任建峰公開認為自己「對得住家人」，而澳洲律師協會會長就公開稱律師有言論自由；但係，係咪有言論自由，就講乜都得呢？筆者肯定絕對唔係。
對於任建峰被除名，香港律師會會長湯文龍就清楚表示，律師會作為業界自我監管專業團體，非常重視會員操守，並將一如既往為業界致力保持最佳專業水平；律師會會忠實地履行作為把關者和專業規管者嘅重要職責，保障公眾利益。而澳洲律師協會會長Juliana Warner就喺聲明指出，《聯合國關於律師作用之基本原則》中確保律師嘅言論、信仰、結社、集會自由及參與公眾討論等權利，《原則》也提及，各地政府及法律專業組織不能基於政治或其他意見等原因，對從事法律專業人士有任何歧視。Juliana Warner嘅講法，似乎有層意思，話任建峰只係「行使言論自由權利」。
呼籲「制裁」自己國家、特區嘅官員或者法官等，係咪行使言論自由權？筆者認為絕對唔係，如果有人對於政府嘅施政、社會政策有意見，作出建議或者批評，呢種意見屬於言論自由；不過，如果公開呼籲其他國家「制裁」自己地方嘅法官、檢控官，咁明顯係勾結外國勢力，而且係嚴重地干預司法、法治，任建峰分唔清兩者，而澳洲律師協會嘅代表，又將兩者混淆。
澳洲同香港一樣係實行普通法嘅地區，司法獨立係法治嘅重要精神，任建峰嘅行為，代表咩？當香港嘅法庭正處理唔同案件包括香港國安法嘅案件時，法官根據證據去判案，但任建峰叫外國去制裁香港嘅法官同檢控官，首先係筆者上面提到嘅勾結外國勢力，其次係作為「律師」，竟然公開高調地叫其他國家去搞法官，呢啲係言論自由？係基於政治或其他意見？唔好講笑啦。
言論自由，向來都唔係無邊無際，如果超越法律底線，就要承擔後果，違反香港國安法係一條法律底線，就如喺普通法，刑事恐嚇以至誹謗，唔會係言論自由嘅一部分。律師嘅基本原則，除咗佢哋都有言論、結社自由，律師都要遵守法律，都唔可以勾結外國勢力去危害到自己國家嘅安全同穩定；任建峰嘅罪行嚴重，如果有加刑因素，筆者覺得，佢身為前律師，卻叫人「制裁」法官、檢控官，應該係罪加一等。
從任建峰嘅案件，去到正在審理嘅黎智英案，讀者們都可能聽到一啲辯解，叫外國「制裁」香港、官員、法官甚至檢控官等，係「言論自由」、「表達意見」啫，讀者們如果代入返2019年開始嘅日子，喺反中亂港分子想推倒特區政府嘅時間，叫外國「制裁」香港，其實係勾結外力兼賣國行為！當有人面不紅、氣不喘話自己呼籲「制裁」嘅行為冇問題時，形同同其他人講自己「賣國冇問題」，真心想國家好、香港好，根本就唔會企喺黑暴同外國勢力一邊，然後公然與國家為敵。
收藏
取消收藏
分享
