【點新聞報道】無綫《人生美食地圖-東京篇》，陳山聰於昨晚（10日）一集談到日本相撲手要幾經艱辛才有機會成名時，山聰感嘆做藝人同樣如是。
山聰說：「你想要一個角色，唔係你想就可以，要經過好多樣嘢，就算你肯捱都好，你都要堅持到；喺我演員生涯入面，我足足堅持咗二十年…我諗每個人都會經歷過畀人無視、畀人當透明，我記得我拍第一套電視劇時，畀導演喺上面panel嗌咗一句好侮辱嘅說話嚟鬧我，因為我當時唔識行位、遮住啲光，講對白又甩咳。呢件事令我明白到，做演員要爭氣、要努力、要好好裝備同學習。」
山聰續指仍是新人期間，試過在家看到自己的演出亦覺得慘不忍睹：「我真係試過返屋企睇演出，真係會喊架。嘩！好肉酸，啲對白講到甩甩咳咳、啲戲又硬。」山聰又指直到《學警狙擊》左輪一角，他的演藝生涯才迎來轉折點：「當時我搵咗師傅艾威，特登攞劇本去佢屋企度叫佢教我點演，當然呢個過程入面有好多好多一線前輩幫咗我好多，然後慢慢你就會知道到底咩戲路適合自己。」又謙稱直到今時今日，自己還在不斷摸索合適的戲路。
陳山聰又談到如何看待曾被批評態度很寸：「後生嘅，尤其做我哋呢行，邊個唔想上位？當你一有機會，你就好想表現，有時會急咗，急咗之後你做咗啲嘢出嚟，你可能覺得冇問題，但會有人覺得乞人憎，Chur得滯、甚至覺得你寸。但依家好多以前覺得我係寸嘅人，都覺得我點解善良咗咁多，其實某程度上係階段嘅問題。」山聰續指其實這些年來，自己性格一直沒有怎樣改變，只是別人對他改觀。
（點新聞特約記者陳惠芳報道）
收藏
取消收藏
分享
稿件由上傳 · 文責自負 · 不代表本網立場
