【點新聞報道】藝人葉子楣（Amy）日前於酒店舉行「華麗相聚之夜」生日派對，延開11席宴請一眾好友包括：胡楓、陳欣健、黃玉郎伉儷、樂易玲、夏文汐，楊仲恩等人，場面熱鬧。Amy於台上多次感謝他們到賀。
宴會開始前，兩邊屏幕先播放由Amy孩童時代至今天的照片所剪輯成的短視頻，及後陳欣健Philip到台上說：「如果要用一個字形容Amy，呢個就係『大』字，因為佢真係好大方，而且佢大情大聖，佢嘅生活同埋職業都係大起大落。雖然佢咁成功，但佢突然間因為遇到一個佢好愛嘅男人，佢可以好大膽咁放棄一切，洗盡鉛華，放棄咗佢嘅名、利同埋社交活動，同佢心愛嘅男人靜靜過幸福生活。但人生就係咁，當Amy無求嘅時候，上天就比咗一個折磨佢，奪去咗佢心愛嘅男人，但呢一個挫折並無打低Amy，佢嘅性格係非常剛強，佢唔單止冇被打低，重更加珍惜人生，佢身邊嘅人係咁寶貴，佢要擁抱現在，以及幫助弱勢嘅人。」
一身性感打扮的Amy現身台上：「有人問我今年生日會係咩主題？亦有人問我今年點解攪個大型嘅生日會？其實真係冇咩特別原因，只係希望大家開心，一班好好嘅朋友係度食飯同相聚，我就已經好滿足同好感恩。我要多謝親姐姐，得佢一個人夠膽鬧我，因為係兩年幾前，我出返嚟俾記者影到相，佢竟然話我做乜出嚟，妳睇下妳，最憎妳出嚟，妳收埋自己咪好囉，妳出番嚟就俾人指指點點，我同佢講做我哋呢行已經習慣俾人影，因為我覺得唔會全部人都鍾意你，亦有人會唔鍾意你，我已經習慣，我記得周星馳都俾網民批評過，不過佢答咗呢六個字『佢未了解我啫』，其實啲人唔了解我，唔知我性格，但我亦都唔會同佢哋解釋，我覺得我就係我，做番我自己係最開心。」現場掌聲雷動並大叫Amy，她續說：「我自已一直心存五個心，對人要真心、對自己有信心、做事要有決心、最重要係懂得將心比心，我相信對人好一定會有回報，就好似今晚見到咁多嘉賓着到咁靚嚟到參加我嘅生日會，我真係好感動，所以我覺得今晚點都係我最好嘅回報同最大嘅感恩，多謝你哋。」
Amy其後換了另一套衣服出來再度高歌一曲草蜢的《失戀》，及後她表示這個生日會令她最難忘的是來自所有朋友的祝福，以及和她一起過生日，令她渡過一個開心的晚上，「我嘅生日願望係心想事成，要乜有乜，今年已經很好，但希望明年更加好，大家愈嚟愈好，我就會好開心。」Amy全晚最開心的一件事，便是馬來西亞拍檔Evians特地把早前由馬來西亞拿督基金會頒發的《80年代最具影響力女演員》獎項人肉速遞到香港給她，對她在電影工作上的肯定。
（點新聞特約記者陳惠芳報道）
收藏
取消收藏
分享
