【點新聞報道】不少移英父母搵子女做擋箭牌，聲稱移民是為了子女將來着想，冀有更佳教育環境。不過，有移英子女卻覺得好反感，話每次聽到父母一講「我哋係為咗你讀書而過嚟」都好大壓力，抱怨表示「可唔可以唔好成日都情緒勒索我」。
一名跟隨父母移英的學生在社交平台threads發文抱怨，「可唔可以唔好成日都情緒勒索我，每次話我咩都好到最後都講『你知唔知點解我哋要過嚟英國，我哋係為咗你讀書而過嚟』」，直言每次聽到都好大壓力。樓主委屈地指，自己一直希望可以留港，只有父母希望移英，「好似無我大家就唔洗嚟呢度咁辛苦，但係明明其實我一直都好想留喺香港，只係你哋不斷話要嚟英國」。樓主又指，其實英國讀書都好大壓力，「只係yr 9 or below先冇壓力」。
帖文講出不少移英學子心聲，有人留言「成日叫我哋體諒你哋班家長，成日話我哋唔知道你哋嘅苦衷，其實講真我哋小朋友都唔輕鬆㗎，返學語言不通+插班，好多同學本身已經有一個friend group，我地可能要用幾個月甚至一年先可以建立到一班朋友，香港嘅朋友因為時差，冇共同經歷越嚟越疏遠，英國又識唔到新朋友，中學一個最青春、最熱血嘅時期，社交幾乎歸零，你哋家長們又明唔明」、「學又唔係佢哋返，個學制個遊戲點玩又唔識，你有困難佢哋又唔識，一味情緒勒索，好老土，最憎。」
有移英父母亦留言撐樓主，「好多父母口口聲聲話為小朋友先嚟移民，其實有幾多父母真係有了解過呢度嘅教育？聽KOL講，人云亦云，過黎讀『國際學校』lu~」、「大人從來為自己，為仔女只係藉口，不過佢哋打死唔認，我都係父母，我非常清楚明白」、「我都係父母，靈魂拷問，好多嘢做咗一係自己細個想要但係冇，所以投射落小朋友度」。
有移英媽媽則表示見過生活不如意的父母將氣出在子女身上，「我做人老母，我見到大把老母唔Ｘ識做人，無錢又要移，唔計下數先移，移咗後悔又話英國差，英文唔好又唔去學。話搵唔到工，其實根本無搵。人地搵到工又眼紅人，廢到只識講人是非。成日話為小朋友，生活唔好又要搵小朋友出氣話為咗佢地。我眼見好多人移英後心理唔平衡，亦見到好多家長人品差，所以我明你感受。家長移英前無做好準備就移，搞完一大輪唔開心又搵仔女出氣。」
收藏
取消收藏
分享
