文/稀思路
中國人有句話叫「風水輪流轉」，直白啲講，即係睇人衰嘅人，之後可能到自己衰；黑暴運動期間，英美等國家「排住隊」抽水，支持發生喺香港嘅暴徒活動，最為極端嘅講法，甚至係美國時任眾議院院長佩洛西，形容香港暴動係一道「美麗風景線」。今日再次「風水輪流轉」，美國加州洛杉磯出現嚴重警民衝突和騷亂，如果我哋好似美國政客咁黑心，係咪要支持下示威者？係咪要學下啲英美政客，表示我哋「與洛杉磯同行」？
發生喺洛杉磯嘅衝突，要講個源頭，其實就係美國近期所有重大矛盾嘅根源——總統特朗普先生，佢由未上任開始，基本上就係打反移民嘅牌，將佢眼中嘅非法移民，視為侵蝕美國嘅魔鬼，喺佢正式上台後，就開始咗驅逐移民嘅工作；筆者講得衰少少，佢嘅驅逐工作，搞到執法人員要跑數咁，要求相關部門喺每個日期內，都要捉到「一定數量嘅非法移民」。
喺加州洛杉磯，近日就有過百名所謂嘅非法移民被捕，事件一直演變，就變成咗警民衝突，有過千人圍堵洛杉磯嘅移民拘留中心同國土安全部辦公點，有示威者設置路障、燒美國國旗，又向聯邦車輛擲石頭、放煙花。特朗普見到勢色唔對，就下令洛杉磯要部署2000名加州國民警衛隊，協助聯邦執法人員。
截至筆者執筆時，事件仍然係越鬧越大，幾百名國民警衛隊被分派到洛杉磯唔同地方，期間同示威者爆發衝突，一度向人群施放胡椒噴霧及催淚氣體，警方驅散示威者時又動用閃光彈，示威者被迫到公路上，公共交通亦受阻。其實，除咗喺洛杉磯，紐約曼克頓日前亦有類似衝突，如果美國示威者同執法人員繼續擴大衝突，呢場驅趕移民行動，可能就會變成全國性衝突。
留意筆者以上行文，筆者係冇講過美國政府執法有錯，亦冇講過要支持非法移民，重點在於，面對非法行為，政府以至執法人員都可以根據公權力執法，今日美國可以因為非法移民執法，當日香港嘅特區政府，利用適當警力去應付黑暴運動，有咩問題呢？面對示威以至騷亂，執法人員作出拘捕、驅散行動可以話係國際標準，當日英美等五眼國家或明或暗支持黑暴運動，如今英美都出現過唔同程度嘅騷亂，而且選擇比香港更強力度嘅執法，又算唔算係自打嘴巴？
一個幾有趣嘅觀察，係今次加州同特朗普政府嘅衝突，除咗係非法移民之爭，仲係一場「地方 VS 聯邦」嘅權力之爭，特朗普係共和黨人，而加州州長就係民主黨人，兩個人一向都唔妥，特朗普想削減加州嘅聯邦撥款，加州州長紐森就表示佢哋上繳嘅稅金，比聯金撥款「多好多」，仲暗示要停止繳納聯邦稅金。睇返資料，加州有接近4000萬人口，但2024年GDP就有4.1萬億美元，仲高過日本可以為「世界第四大經濟體」，當美國近乎最富裕嘅地方同聯邦政府打對台，後果會變成點？
如果要推測事情發展，加州以至紐約開咗個頭，其他州份、大城市等，應該都可能會出現支持移民嘅示威，即係特朗普又成功「開打一條戰線」。喺傳統嘅認知，美國總統係「全球最有權力嘅領袖」，筆者唔知道，如果全球最有權力嘅人，同時向全球作出挑戰，最後邊個會贏？最近有投資人諷刺特朗普，話「特朗普經常退縮」（Taco - Trump Always Chickens Out），若然特朗普連應付國內移民問題都要退縮，只怕美國「不能再強大」了……
收藏
分享
