文/稀思路
近期，世界出現咗好微妙嘅變化，以前全球主要國家（尤其係西方國家）主要都係睇美國頭，美國可以話係世上嘅單極霸權，佢話一，其他國家唔敢話二；但自從特朗普再次成為美國總統後，世界就出現變化，當佢向全球開打關稅戰後，美國更加成為唔少西方國家嘅敵人，唔同國家都開始覺得，似乎同中國做朋友，好過做美國嘅所謂盟友。最近，就有調查指出，中國嘅全球淨好感度勁升，而美國就勁跌，全球對中國嘅好感度遠勝美國，當中原因係咩？基本上都唔需要筆者分析啦！
根據美國嘅諮詢公司一項民意調查顯示，截至5月底，中國嘅全球淨好感度為8.8，美國為-1.5，呢組數字喺過去幾個月，真係好大變化，譬如，之前中國嘅淨好感度係負值，而美國之前一直都係淨值，喺去年一月，美國嘅好感度淨值係20，今年三月就畀中國超越，四月跌到負值，最近跌到接近-8，同中國嘅差距最為大約18，簡單講，就係全球人民對中國有好感，對美國就係觀感負面。
唔講其他國家，其實剩係美國國內對中國嘅好感/反感程度，已經有好豐富嘅資訊量，例如喺美國65歲以上嘅年齡層，呢班人仲有大約一半係對中國有「敵意」，佢哋亦係經歷過冷戰時期嘅一輩人；去到50至64歲嘅美國人，對中國有敵意嘅，已經下降到37%。如果再去到30歲以下嘅美國人，對中國有敵意嘅只係得返21%，有新聞報道指，美國嘅年輕人，其實就係喺中國加入世貿時代成長起來嘅一群人，佢哋見證咗中國快速發展，亦享受到中國發展帶來嘅各種紅利。
對於全球好感度嘅「東升西降」，唔同媒體、專家有唔同嘅分析，筆者從最正常嘅角度去睇，就係特朗普嘅政策太討人厭，一啲美國嘅朋友，本來未必「鍾意中國多於美國」，但就因為特朗普嘅霸權作風，對外挑釁全球，對內打壓異見，搞到美國開始變成人見人憎；喺呢個情況下，一向以和為貴、以禮待人嘅中國，更受歡迎亦係好合理嘅事。
除咗中國嘅合作、共贏同尊重別國嘅作風，中國之所以更受歡迎，其實同中國發展本身都好有關係，例如依家喺全球熱爆嘅大型語言模型，過去幾年都係畀美國壟斷，依家中國嘅DeepSeek（深度求索），基本上已經可以挑戰美國嘅人工智能「堡壘」；其他包括中國嘅無人機、機械人以至電子遊戲大作等，一樣令世界見識到中國嘅軟硬實力，當有國家、外國人捨棄美國，擁抱中國就係最佳選擇！
全球對中國嘅好感度，會唔會進一步提升？而對美國嘅反感，又會唔會進一步增加？筆者認為絕對有可能，因為特朗普嘅過分行為，肯定仲會繼續。筆者一直都覺得，西方政客係信唔過嘅，美國政客可以因為自己國家負債高、開支大，展開一場「全球搶劫行動」（關稅戰）；英國亦可以因為一己私利，隨時放棄BNO「5+1」嘅移民。中國崛起，就係為世界帶來確定性，以及帶來多一個選擇，如果唔想一直被美國欺凌，成為「被劫的盟友」，同中國建立更深厚關係，就係對各國最有利嘅事情。
收藏
取消收藏
分享
