文/稀思路
最近，喺英國移民圈有一個熱門話題，就係英國首相斯塔默，宣布會收緊移民措施，基本上之後就唔會再有英國居住5年會獲得定居同公民身份，除咗有可能將居住年期延長至10年之外，移民人士仲要符合英語要求等等；一班移英港人，就聚焦討論單嘢關唔關用BNO「5+1」計劃移民英國嘅香港人事，甚至有人已經抵受唔住，想放棄移英計劃。其實，由「5+1」變「10+1」除咗可能適用於移英港人外，當筆者睇衰英國政府，之後變「15+1」甚至取消計劃，都一樣有可能。
喺移英港人嘅Facebook群組，有一啲本身都係移英人士嘅人就大潑冷水，話自己呢幾年見唔少人去到英國洗腳唔抹腳，工作未有，就旅行、買樓、畀錢子女讀英文，最後根本計唔掂條數，返工又嫌錢少，放血（用錢）放到「一地都係」；更加悲觀嘅諗法，直頭係討論就算等到「5+1」以至「10+1」，都未必入到籍，因為有啲移民英國嘅人，其實英文好水皮，要過到英國政府可能增加嘅英語水平要求，根本係好困難。
對於呢啲移英港人嘅憂慮，筆者可以同各位讀者一層一層咁睇，先由上面講到可能增加嘅英語要求去睇，如果英國政府收緊移民嘅政策係包括BNO「5+1」計劃嘅移英人士，相關嘅英語要求，唔係日常溝通到就可以，而係可能要求移民人士正式申請定居時，通過可以睇到英文「複雜文本」嘅要求，如果本身英文唔好，或者冇一定學歷，極度難搞。
下一個問題，就係英國政府將推出嘅移民措施，會唔會最終唔關BNO「5+1」人士事？筆者係唔會樂觀，因為之前寫文都分析過，基本上依家英國政府嘅立場，就當BNO「5+1」計劃下移居英國嘅人士，係屬於「臨時」、「人道」性質，如果英國要全面收緊移民政策，一來冇必要優先照顧香港移民，二來如果真係要比較，筆者亦唔相信香港人移英嘅「需要」，會大得過由烏克蘭移居英國嘅人。
近日有單新聞，可能唔係好多人留意到，日前有接近1200名非法移民乘船偷渡英吉利海峽，創下今年單日穿越英吉利海峽嘅人數新高，英國首相斯塔默因此被指對英國邊境「失去控制」；睇返數字，自2018年以來，已有超過15萬人通過小船偷渡抵達英國，英國內政部發言人表示，英國正與法國合作阻止偷渡行為，同時保護邊境安全。英國邊境失控，故然係一個問題，但當反對非法移民嘅聲音成為英國內部共識，英國每年又可能要用成千億港元向移民提供福利時，輿論點發展好清楚，就係英國人可能會「咩移民都反對」，包括移居英國嘅港人。
如果要嚟一個沙盤推演，筆者嘅估計可能會得罪好多移英港人，但讀者可以諗下推測係咪合理。從「過去」嘅時間線睇，就係黑暴運動爆發，英國要「扮好人」收留移英港人，所以有BNO「5+1」計劃；「現在」或後段少少嘅發展，就係「5+1」可能變「10+1」再附帶英語要求等等；「將來」嘅發展，就係反移民嘅政黨可能破天荒喺英國執政，「10+1」會唔會變「15+1」，好難講，甚至當整個英國本土都反移民時，相關移民途徑可能會被封。筆者一直強調，香港人睇英國人，同英國人睇香港人係唔同嘅，可能有英國人對香港人「有感情」，但一般而言，始終都係當香港人係外人，事情會點發展，好快就會有分曉。
收藏
取消收藏
分享
