文/稀思路
前一段日子，好多評論、分析喺度講特朗普第一次上任美國總統（1.0）同特朗普第二次上任（2.0）有咩分別，包括國內外情況、特朗普處事手法等等，形容特朗普2.0影響力全面升級，筆者睇得簡單啲，特朗普2.0其實就係乜都亂嚟！對外國發動關稅戰係咁，對待國內問題亦一樣，因為哈佛大學嘅問題，特朗普想禁哈佛收國際生但被法律挑戰，今日筆者一瞓醒，又睇到美國國際貿易法院裁定特朗普關稅政策係違法嘅新聞。其實，咁落法，特朗普國外國內都被圍攻，仲點施政？或者咁講，佢仲點作威作福？
最新新聞，美國國際貿易法院作出禁制特朗普「解放日」關稅嘅裁定，表明特朗普嘅關稅政策違法兼要禁制，特朗普表明會上訴，而有趣嘅係，喺相約時間，美國嘅道指、標指期貨以及納指100期貨等，基本上都係升，即係話，對於特朗普濫施關稅被禁制一事，「連股市都讚好」。
睇返相關內容，國際貿易法院就指出，美國憲法賦予美國國會專屬權力來規範與其他國家嘅貿易，而總統為保護美國經濟而行使緊急權力，係不會凌駕於呢啲權力（國會）之上，特朗普以貿易逆差為由，用其緊急權力徵收關稅，係屬於「越權」行為，所以裁定要禁止特朗普4月2日所實施嘅所謂「解放日」關稅，亦都阻止特朗普執行今年初對中國、墨西哥和加拿大實施嘅關稅。不過，禁令唔影響依據《貿易擴展法》第232條對汽車、汽車零件、鋼鐵或鋁徵收嘅25%關稅。
其實，國際貿易法院講得好清楚，特朗普係「越權」，或者講白啲，特朗普就係亂嚟。用法律概念去講，「越權」（ultra vires）呢個概念早就存在，例如法律賦予某位國家領導一定權力，行使權力範圍內嘅事冇問題，但如果所作所為係超出權力，就係「越權」（ultra vires）；今次美國法院嘅裁決，雖然可能因為特朗普上訴而有變數，但讀者們可以睇到，特朗普嘅行為，由商界、學界、普羅大眾到法庭，都唔太支持佢嘅做法，可以話係眾叛親離。
早前，特朗普對哈佛大學動手，想禁止對方收國際學生，迫哈佛大學交出學生名單，哈佛大學就成功向法院申請暫緩生效，肯定雙方之後仲會有一場場訴訟戰。筆者嘗試用一個人性角度睇以上事件，一切根源，在於特朗普「太自大」，以為向其他國家濫施關稅，其他國家就會讓步；又以為向國內名校施壓，各大名校就會即刻「跪低」，要錢畀錢，要名單畀名單，結果由內到外都對美國政府反抗，即係全球人類，一齊向特朗普說「不」。
根據暫時嘅觀察，特朗普以至其政府似乎都冇修正錯誤嘅取向，甚至係要「一錯到底」，最新消息講緊美國國務卿盧比奧，表示美國將開始強行撤銷喺美國嘅中國留學生簽證，包括喺關鍵領域學習嘅中國留學生，仲會加強審查今後所有來自中國內地同中國香港嘅簽證申請。其實，由特朗普到盧比奧以至美國政府，係咪有少少「精神分裂」？一邊喺關稅問題向中國讓步、尋求協議，一邊又打壓中國留學生，到底諗緊咩？講真，中國以至香港都唔會怕特朗普政府打壓，依家美國玩政治自殺，我哋不必阻止佢；當有一日美國盟友變敵人，國內支持者變反對者，讀者們就可以真正見識到咩叫「讓美國再次強大」喇！
收藏
取消收藏
分享
