【點新聞報道】移民英國的港人圈子在社交平台上互相批鬥，都已經成為常態啦。一名移英港女日前在網上發文鬧爆移英同路人一到埗即刻變臉，開始計較、踩低、鬧人，講起自己條命就扮晒醒、裝晒高尚。帖文獲不少網民和應，留言「移得民嘅，都係大難臨頭各自飛嘅人，會係咩心態 」、「冇喺你背後落井下石其實已經要還神」。
一名移英港女在社交平台threads有感而發，表示「移民咗英國之後，最意想不到嘅，唔係天氣、唔係語言，而係存在於各個Social Media嘅香港人。」樓主指，別以為同路人會守望相助，「現實係，有啲香港人，一嚟到英國就即刻變臉，開始計較、踩低、鬧人『冇準備就唔好嚟』咁款」。明明大家都係新移民，「但講起自己條命就扮晒醒、裝晒高尚，啲『移民成功學』背後，充滿咗比較、競爭、冷漠」。
樓主直指「同聲同氣唔代表同路」，舉例指「你想搵人傾計，對方回你一句：『呢啲你自己都應該早啲諗好啦』；你想搭個network，對方反問你：『咁你想攞我咩着數先？』」樓主慨嘆指，「最諷刺係——唔係外國人令你覺得難融入，係有啲香港人，令你覺得自己格格不入。」
帖文獲不少網民和應，「你要明白，移得民嘅，都係大難臨頭各自飛嘅人，會係咩心態」、「冇喺你背後落井下石其實已經要還神，當然如果遇到啲真心幫你嘅，就真係要好好珍惜，但呢類人嘅，我覺得真係少數中嘅少數」、「呢個世界咩人都有，移英港人社區其實係香港唔同種類嘅人嘅縮影/濃縮版。嚟咗4年幾真係咩都見過，有啲人不打不相識，有啲人就真係人久見人心。」
有老移民則分享遇到新移英港人的經歷，「我看完這篇文章都有應同感。我在英國生活咗已超過28年，前幾年知道有BNO香港人移民來英，覺得很好，因為可以有香港人同我傾計及看看他們有什麼我可以幫得上。所以在街上，商場及超級市場就好熱情向他們打招呼，微笑及揮手，甚至乎說：你好 ，你們是否剛從香港來啊？…. 這句說話都未講完就黑面離開。連續好幾次都是這樣，那是我在想發生了什麼事情難道我去關心他們都是錯嗎？所以令我現在都不敢向任何香港人打招呼。」
收藏
取消收藏
分享
