文/稀思路
如果讀者們之前有睇下荷里活電影、美劇，可能會有一種「美國真亂」嘅感覺，有財有勢嘅人身邊多異性，上流「向上流」之前，都會有好多鮮為人知嘅故事，呢啲故事好少浮上水面，或者會由富豪級人馬講出口。直至最近，美國上流社會以至傳媒「滿地花生」，因為前世界首富比爾蓋茨，話現世界首富馬斯克「殺害貧窮兒童」，然後馬斯克又反駁對方「同淫魔行得好近」，到底件事係點？稀思路依家同大家「去文」！
比爾蓋茨同馬斯克有仇口，都唔係今日嘅事，或者精準啲講，馬斯克同好多人都有仇口，早前，比爾蓋茨就指摘由馬斯克領導嘅「政府效率部」，要削減美國國際發展署的撥款，做法等同於「殺害貧窮兒童」，馬斯克把口一向尖銳，就回敬比爾蓋茨「蓋茨以為自己是誰，敢對兒童福利評頭品足？」
馬斯克仲話，比爾蓋茨同愛潑斯行得好近，佢先唔想比爾蓋茨照顧自己嘅孩子。嚟到呢度，讀者當然會好奇，到底邊個係愛潑斯坦（唔係愛因斯坦）？已故嘅美國富商愛潑斯坦，曾因為性侵未成年少女入獄，並且2019年喺獄中離奇死亡，根據報道，愛潑斯坦被指涉嫌同幾十名未成年少女發生性行為，甚至性販賣未成年少女，而比爾蓋茨呢，就被指同愛潑斯坦「過往甚密」，其實馬斯克嘅講法，係帶有向比爾蓋茨作出指控甚至指對方「有份淫亂」嘅意味...
比爾蓋茨對馬斯克作出批評，馬斯克又一下子用暗示方式將指控推到咁盡，誰是誰非？筆者知道，之前馬斯克爭啲同另一富豪朱克伯格上擂台決鬥，既然依家比爾蓋茨同馬斯克一個指對方「殺人」，一個暗指對方「淫亂」，所謂真理越辯越明，筆者建議，兩位世界級富豪，可以一齊上美國電視節目，好好辯論一下，睇下誰是誰非，又畀大眾睇下，到底邊個係真小人，邊個係虛君子。
筆者更加想講嘅係，其實美國一班頂流富豪，表面上係美國嘅代表同象徵，實際上，佢哋只係美國極少數嘅代表，真實嘅美國，一般美國人唔會有富豪嘅閒情逸致「你串我」、「我又串返你」，而係生活都有問題，依家喺特朗普治下嘅美國，由政界、商界（較小規模企業）到學術界等，全部都畀特朗普搞到風聲鶴唳，有啲本身札根美國好耐嘅人，甚至被迫、被趕離美國，當馬斯克喺經濟論壇講政治以至講比爾蓋茨時，一個不爭嘅事實，係馬斯克自己有份幫特朗普搞亂美國甚至世界。
至於比爾蓋茨，據報佢曾經就同愛潑斯坦往來「公開致歉」，一個頂級富豪去公開道歉，一樣「好人有限」；過去多年，比爾蓋茨靠住有壟斷優勢嘅電腦作業系統致富，即使捐咗大部分家產出去，都仍然係世界頂級富豪，筆者想講，佢嘅作業系統除咗受到蘋果挑戰，亦都已經出現咗新對手，就係由華為自己開發嘅電腦作業系統。
一個有趣嘅觀察，無論係馬斯克嘅電動車，以至係比爾蓋茨嘅電腦作業系統，都曾經稱霸世界，但喺美國內鬥、不思進取嘅同時，不同嘅領域，唔單止中國企業、商人會進場，可能好快喺不同範疇（包括晶片業等），世界各國就可以擺脫美國壟斷，唔需要再畀錢呢啲私德有虧嘅美國商人賺到盡！
收藏
取消收藏
分享
