文/稀思路
最近有單「笑聞」，話說向來針對香港嘅美國，其參議院提出所謂《香港司法制裁法案》，聲稱要「制裁」香港國安法法官同相關司法人員。所為何事？當然又係因為美國要針對香港國安法啦，一班美國參議員，一時稱香港「打壓」人權，一時又話破壞「自治同自由」，但如果我哋將呢啲指控放在美國總統特朗普身上，其實更為合適，因為香港官員、法官都係依法辦事，而特朗普唔同，佢係赤裸裸地破壞法治、人權同自由，一班美國參議員包括共和黨嘅，睇唔到美國發生咩事，而好似有「遠視」咁戴住有色眼鏡睇香港，實在有趣！
對於美國參議員以至眾議員嘅套路，筆者認為係毫不出奇，因為香港作為中國嘅特區，又係國際城市，美國借香港嚟針對中國「好正常」，而香港國安法嘅執法，主要針對嘅違法人士，好多都係美帝喺香港嘅爪牙，美國主子要為爪牙出頭，最直接就係借香港國安法嘅執行，嚟針對或者實施所謂「制裁」。但用一個最簡單嘅道理睇類似事件，當敵人針對香港做一件事，大概中央同特區政府就係做咗正確、正義之事。
香港國安法嘅執行，簡單又直接嘅效果，就係止暴制亂，如果要講維護國家安全嘅法制，呢方面美國先係「祖師爺」，國安法律可能超過20條，內容層出不窮，執法手段更加係隱密而殘忍。不過，以上所講嘅，都唔係筆者想講嘅重點，今日筆者想講嘅係，破壞法治、人權同自由，應該係特朗普先真。
特朗普2.0（再次上任美國總統）時代，係一個只有強權、沒有公理嘅年代，上任咗100日多啲，人權狀況不堪入目，例如，以強迫失蹤嘅方式將移民遣返薩爾瓦多，極力打壓言論同集會自由，聲援巴勒斯坦嘅人，學生拉，老師趕，移民驅，美國唔少著名學府成為打擊對象。一個行政命令，遠勝國會甚至法院，根據最鍾意「觀察」嘅「人權觀察」說法，「短短一百天內，特朗普政府已對美國和世界各地的人權造成巨大傷害。我們深感憂慮，這些對基本自由的打擊未來將有增無減。」
問題嚟喇，美國國內問題叢生，人權狀況慘不忍睹，點解美國搞到一團糟，但一班參議員就當睇唔到，反而走嚟針對香港呢？仲有，佢哋要「制裁」香港法官嘅要求，更係破壞、干預緊香港法治，香港法官處理每一宗涉及國家安全嘅案件，除咗有理有據，更係依足法律程序去審理，美國政客嘅做法，係政治干預香港法治，更加係踩過界。
套用香港特區政府嘅聲明，對於所謂制裁嗤之以鼻，無懼任何威嚇，定當堅定不移履行維護國家安全的責任。特區政府強烈敦促該等美國政客認清事實，立即停止不符合國際法和國際關係基本準則的行為，並立即停止干涉純屬中國內政的香港事務。筆者唔知道，美國一班政客係咪太得閒，定係「太關心」香港，如果一班美國政客對國內問題視而不見，而走嚟干預香港事務，難怪今日美國，墮落至此，筆者覺得美國可悲之餘，更係可笑！
收藏
取消收藏
分享
