筆是機場｜BNO「5+1」或被收緊　移英港人隨時「拜拜」

文/稀思路

如果讀者們有睇開稀思路文章，當稀思路講到英國問題時，不時都會重複一套論述，就係英國今日畀港人用BNO「5+1」計劃移英，但隨時收緊計劃、增加門檻甚至撤銷計劃，點解筆者要咁講？因為英國由頭到尾，就無當過香港人係「自己人」，充其量，香港人就係「可以利用的工具」，用嚟針對中國。好喇，講下講下，依家英國真係有計劃收緊移民門檻、增加居留年期等，唔少人抬晒成副家當去英國，如果要等多五年甚至更耐先有機會成為英國公民，講真，等唔等到呢日？

英國首相斯塔默，喺當地時間12日，宣布會收緊移民措施，在新系統之下，將會終止喺英國居住5年嘅人自動獲得定居同公民身份，除非佢哋對經濟同社會有「真正而持久的貢獻」，否則，必須喺英國居住10年先可以申請永久居留。此外，移民人士可能仲要符合英語要求，申請簽證延期，要通過高級嘅英語A2考試；如果係申請定居，更要求通過B2考試，大抵就係要能夠解「關於具體和抽象主題的複雜文本」，以及能夠「以一定的流利程度進行自發交流互動」。

一個好重要嘅問題嚟喇，咁用BNO「5+1」計劃移居英國嘅港人，會唔會喺呢個計劃入面？相關政策白皮書並沒有講得好清楚，但就有分析指出，從文件嘅語境，可能已經隱含地表示包括埋BNO「5+1」計劃，例如白皮書多次用「臨時性人道方案」嚟形容BNO「5+1」同烏克蘭簽證在內嘅移民計劃。BNO「5+1」被納入「臨時」類別，即係意味英國政府未來落實移民政策時，「臨時性質」嘅BNO「5+1」計劃，隨時會被增加門檻、延長居留要求甚至日後被「拜拜」。

筆者唔係有咩先見之明，只係打從心底，由一開始，就覺得英國係信唔過嘅！先唔講BNO「5+1」計劃，讀者們可以回想下當年嘅BNO，喺《中英聯合聲明》，中國同英國有就國籍問題交換備忘錄，當時英國政府表明「不會賦予持有BNO護照的香港的中國公民居英權」，即係早喺中英談判時、香港回歸祖國前，英國就冇打算要接收香港人。多年之後，即係黑暴運動之後，英國話以BNO「5+1」畀香港人移居英國，真係可以完全相信咩？

睇返英國嘅情況，佢哋要脫歐其中一個原因就係唔想咁多移民，近年右翼政黨迅速崛起，打嘅亦係反移民旗號，英國有咩可能再無限量接受移民，兼且仲要當香港人係「自己人」？仲有，讀者們留意下國際形勢，當初英國站隊美國要針對中國，喺黑暴前後呢個跡象更明顯，依家英國以至歐盟都有同中國重修關係嘅勢頭，要移居英國嘅港人，某程度上已經係棄卒。筆者知道，有香港人賣車賣樓攞晒啲家產再投入英國懷抱，依家可能要留多5年先可以申請永久居留，但條路始終係自己揀，筆者最多只能講句，I'm so sorry to hear that。