文/稀思路
早前，通緝犯郭鳳儀父親因為今年初曾協助郭鳳儀處理保單，以及企圖提取保單結餘，所以被控「企圖處理潛逃者的資金罪」，申請保釋被拒；喺相近日子，另一通緝犯鄭敬基，其表弟夫婦亦被警方帶走調查。警方執法，天經地義，偏偏成日對香港指手劃腳嘅「末代港督」彭定康又喺度說三道四，稱「香港法治跌至新低」。其實，如果警方有法不執，任由他人危害社會安全，先至係令法治受損，好明顯，彭定康又喺度藉機抹黑香港！
喺香港嘅維護國家安全法制，有一套健全防範機制，除咗危害國家安全嘅人違法，同佢哋有資金來住、幫佢哋處理資金嘅人，一樣可能走入法網，郭鳳儀父親幫佢處理保險單，甚至係幫佢「套取利益」，其實已經有犯法罪嫌，一個通緝犯，有人喺金錢上幫助、支援佢哋，間接助長罪行，筆者想問，彭定康要嘈咩呢？
根據報道，彭定康批評特區政府之餘，仲要求特區政府「立即放人」，香港回歸祖國已經接近28年，一早唔係由英國進行殖民式管治嘅地方，彭定康根本冇任何資格對香港事務指手劃腳；更重要嘅係，任何地方包括香港以至英國，都要維護國家安全、社會穩定，如果彭定康連呢點都唔明，咁就不如少啲出聲。
好簡單，以英國為例，之前大規模暴動拉咗咁多人，英國有冇完全循從法治原則呢？筆者睇新聞，英國當時係玩「快速審判」，有被定罪嘅年輕男子，被「純熟迅速」地被判監20個月，另外亦有被告因為煽動被「快速判決」，如果彭定康咁關心法治，其實可以多啲關心英國本土嘅法治狀況；香港嘅問題，真係唔需要佢「關心」。
兩個好大嘅盲點，就係彭定康好，其他外國政客都好，首先佢哋通常都唔會譴責黑暴暴力，但係就會針對香港警察執法；第二就係當警方以香港國安法或者《維護國家安全條例》去執法時，佢哋更會全方位攻擊法律，又會藉機拉埋法治嚟講，但係，講到維護國家安全嘅法律，英國有，美國有，其他「五眼聯盟」國家都有，點解香港有以及執行就唔得呢？
黑暴運動係已經過去，但係外國政客嘅干預從無停止過，最近，甚至美國總統特朗普，都話可以將「黎智英問題」納入中美談判嘅一環。對於外國嘅種種干預，我哋都要堅決說不，諸如彭定康之流，筆者更想講香港事唔關佢事，佢要關心，可以關心下英國嘅政治、經濟以至亂局，如果要為「被告喊冤」，先為英國暴動案嘅眾多犯人「伸張正義」，仲想搞亂香港，No Way！
收藏
取消收藏
分享
