文/稀思路
之前，筆者唔止寫過一次文章講民主黨，由喺立法局最多時有19個議員，到最後淪落到要解散，係因為民主黨走上攬炒之路；如果將問題再挖深少少，點解民主黨會走上不歸路呢？咁係因為民主黨老一輩嘅人，基本上就係畀後生一輩挾住走，由「和理非」變「縱暴派」，其中一個後輩就係許智峯，許智峯呢個人，去到邊就陀衰邊度，最近佢喺澳洲幫自己所屬嘅自由黨候選人拉票，結果係點，就係自由黨慘敗，工黨大勝。
幾日前，許智峯喺Facebook發文，話自己喺澳洲國會選舉投票日，「一盡黨員的責任，幫自由黨候選人拉票」，佢呢個Post，真係又要威又要戴頭盔，一方面話自己幫自由黨拉票，一方面又話其實工黨有候選人/現任議員過去都為香港「發聲」，仲話自己未來會參與更多澳洲嘅政治工作，擴大香港人嘅政治影響力。筆者想問許智峯，有冇打算將攬炒思潮帶去澳洲先？佢最興玩呢味嘢！
有啲人，本質有問題，去到邊，基本上就係「衰」，喺香港嘅時候，包括許智峯在內嘅政客，一味想搞亂香港；去到澳洲，其實許智峯加入嘅自由黨都相當有特色，有分析就指，澳洲嘅自由黨大敗，係因為本身自由黨想靠「特朗普效應而獲勝」，但係依家全球都對特朗普嘅施政作風有所抗拒，走保守、右翼路線嘅自由黨，當然會畀澳洲選民Say goodbye啦，依家自由黨又有許智峯加入，實在係「如虎添翼」。
如果我哋將攬炒派、香港通緝犯喺外國「參政」嘅問題放大啲，其實成班人都係「黑氣石」，將衰運帶到世界每個角落；另一通緝犯鄭敬基喺加拿大參選，被另一華裔候選人擊敗；喺英國，向來支持BNO「5+1」計劃嘅保守黨，又輸到連對手「車尾燈都見唔到」，由鄭敬基、許智峯等等，吸納佢哋嘅政黨政團，其實係吸納緊本身會破壞社會嘅人，單係呢點而唔講其他嘢例如政綱，就已經相當有問題。
過去一段日子，筆者一路有個疑問，一個又一個被香港通緝嘅疑犯/罪犯，人去咗外國，外國因為政治原因想「保護」佢哋，呢點已經有違法治，而當佢哋一個又一個咁喺外國從政，吸納佢哋嘅外國政黨，係咪容許自己黨員去危害中國嘅國家安全呢？筆者以許智峯所在嘅澳洲為例，一樣有《國家安全立法修正案（間諜活動及外國干預）法》、《外國影響力透明化法案》等維護國家安全嘅法律，當澳洲「接納」許智峯嘅同時，其實亦係間接支持緊危害中國國家安全嘅攬炒政客。
由2020年到今日，黑暴運動已經過去咗差唔多5年，5年後今日，潛逃到海外嘅攬炒派政客，仍然想食「黑暴水」，仍然成日借機抽水。其實，佢哋喺海外已經無乜市場，當外國嘅政黨吸納、利用佢哋嘅時候，筆者好想問，「政治負資產」有咩用處？如果破壞香港法治、危害國家安全嘅人去到外國變成「從政者」，係咪downgrade（降級）你哋個政黨？
收藏
取消收藏
分享
