文/稀思路
2019、2020年黑暴運動演得最烈時，基本上攬炒派人士都沖昏頭腦，以為香港「係佢哋嘅」，打人、放火、刑毁等等，乜都做得出；但人算不如中央算，中央制定香港國安法，香港執法部門有咗有效嘅法律工具，一班政客即刻無晒計，直到依家，仲有唔少政客喺監獄「找數中」。其實由2020年到今日，已經事隔五年，有攬炒派人士以為自己仲有市場，係咪太天真呢？曾經因為洗黑錢等罪被判入獄嘅阮民安，最近話自己「在港娛樂事業close file」，其實嚴格嚟講，係所有攬炒派都應該「close file」先真。
最近，歌手阮民安（Tommy）因為前年年底喺一間餐廳內無牌舉辦音樂會，日前喺法院承認一項無牌公眾娛樂場所傳票罪，被罰款3500元，一如攬炒派作風，佢喺庭外話案件「荒謬」，但自己唔想糾纏，所以認罪，又話自己喺香港嘅娛樂事業因本案「close file」，聲稱會返英國定居，預料日後會喺海外發展。
真心講，係芸芸眾多攬炒派人士當中，有一啲係稀思路特別討厭嘅，其中兩個，一個係許智峯，一個就係阮民安。阮民安未做過議員，又無親身參與過暴力活動，點解特別憎佢？因為佢借社會動亂呃人錢！之前筆者已經寫過，佢涉及嘅其中一宗案件，包括「洗黑錢罪」，事緣佢有份同其他人謊稱「A小妹妹」被控暴動同受審，所以售賣曲奇為「A小妹妹」籌錢，結果「A小妹妹」係假嘅，但有部分錢，就入咗落佢舅仔嘅戶口，據報，仲曾經有筆錢入咗賽馬會戶口作賭博用途，呢啲係「黑吃黑」，亦都係「黃吃黃」。
阮民安打算喺海外發展，恕筆者直言，筆者估計佢都唔會有太大市場，一來佢聲名狼藉，二來佢本身就唔係特別受歡迎嘅藝人。其實黑暴運動之後，隨住日子過去，黑暴人物嘅名氣以至籌款能力，就一步一步咁下滑，最近國安通緝犯、前藝人鄭敬基喺加拿大參選國會大敗，鄭敬基仲形容今次參選係「一生中最大的榮耀之一」。其實側面睇事件，係黑暴人物已經開始被世界淘汰。
鄭敬基嘅對手，有超過12年市政公職經驗，聚焦喺當地嘅公共安全、社區空間以至交通設施等問題；而鄭敬基呢？人在加拿大，但就比較依重反華宣傳，例如炒作中國（以及香港特區）議題，虛張聲勢，但加拿大選民都唔係傻嘅，一個候選人關心社區問題，一個人喺加拿大但就「好關心」中國以至香港特區嘅議題，邊個會贏，結果都好明顯。
世界局勢嘅變化，唔單止影響住唔同國家嘅經濟命脈，其實亦影響住所有人嘅生活。自從美國開始走極端嘅霸權路線，美國以外嘅國家，即使本身曾針對過中國嘅，都開始研究點樣同中國改善關係。黑暴運動已經過氣，世界環境又再變化，攬炒派人士如阮民安、鄭敬基甚至袁弓夷等等，仲玩反中亂港，藉機搞事，有咩市場？黑暴運動已經「close file」，攬炒派喺世界各地都應該「close file」，最好就係，唔同嘅國安通緝犯，返嚟香港投案，令唔同嘅危害國安案件可以真正「close file」！
收藏
分享
