移英吳日言自爆與老公鬧大交　街頭對峙逾10分鐘

【點新聞報道】已一家移民英國的過氣歌手吳日言，早前大病一場後，日前就感性發文話「學懂更加珍惜眼前人」。她自爆初到埗英國時，曾跟老公發生拗撬「我同老公已經喺市中心街頭上鬧大交，兩個人在大街度對峙十幾分鐘。」不過，最重要是兩個人床頭打交，話鬧下鬧下咁就幾十年。

吳日言早前在社交平台發文大呻，與兩名兒子先後染病，她更發高燒至40℃，血含氧量降到83，最後要留院3日才可回家。她前日（28日）晒出全家福，並說「剛剛大病一場，讓我學懂更加珍惜眼前人」。她提到最近睇到娛樂婚姻的報道，多數都是悲劇，她憶述朋友曾對她說：「兩公婆去外地生活，拗撬爆燈㗎，因為朝夕相對，你真係會見到對方嘅隱藏功能。」

她自爆初到埗英國時，曾跟老公發生拗撬，「我同老公已經喺市中心街頭上鬧大交，兩個人在大街度對峙十幾分鐘」。她坦言夫妻鬧交很正常，尤其是生了小朋友後：「其實夫妻鬧交好正常，尤其係生咗細路之後，老公大多數都會呻以下幾樣：生仔之後，你完全變咗人！整日鬧我砌模型、儲波鞋、打波！而家對我冇以前咁溫柔喇！」

Yan表示做老婆嘅也想像以前一樣：「想食就食、想買就買。做返當年屋企個小公主。只可惜當年嗰件小背心，我哋都已經着唔返啦！朋友群都進化成自己仔女同學嘅成長。每日掛喺嘴邊嘅係：快啲食！快啲做！快啲瞓！」

Yan同老公由拍拖至今已經25年，她分享兩人相處之道：「就係......俾佢出去玩！不過......我一定會黑面。最重要係，佢要識得返嚟氹返我。兩個人牀頭打交，牀尾又生多一件，鬧下鬧下咁就幾十年，祝各位家庭相親相愛。」